1 nömrəli posta ilkin iddiaçılar
Ukraynada prezident seçkisi kampaniyası davam edir. Martın 31-nə təyin olunmuş seçkidə 35 yaşa çatan, son 10 ildə Ukraynada daimi yaşayan və dövlət dilini bilən ölkə vətəndaşları namizəd ola bilər. Prezidentliyə iddiaçılar 2,5 milyon qrivna (150 min manat) girov da qoymalıdır. Prezident seçilə və ya ikinci tura çıxa bilməyən şəxsin seçki girovu dövlət büdcəsinə köçürülür.
Namizədlərin irəli sürülməsi ötən il dekabrın 31-də başlayıb. Proses fevralın 3-də bitəcək.
Novator.az bildirir ki, hələlik 6 iddiaçı Mərkəzi Seçki Komissiyasına sənəd təqdim edib: sabiq ekologiya və təbii sərvətlər naziri İqor Şevçenko, hüquq müdafiəçisi Vladimir Ratuş, Sosial Demokrat Partiyasının lideri Sergey Kaplin, Aqrar Partiyanın sabiq lideri Vitali Skotsik, Təhlükəsizlik Xidmətinin sabiq başçısı Valentin Nalivayçenko və Lvov şəhərinin meri, Samopomoş Partiyasının lideri Andrey Sadovıy.
Hazırda prezident postunu Pyotr Poroşenko tutur. O, 2014-cü il mayın 25-də Ukrayna prezidenti seçilib.
