Bir məkanda 46 xidmət
Prezident İlham Əliyev yanvarın 3-də Əmlak Məsələləri Dövlət Komitəsinin Əmlak Xidmətləri Məkanının açılışında iştirak edib.
AZƏRTAC xəbər verir ki, Əmlak Xidmətləri Məkanında 46 xidmət (dövlət əmlakının idarə edilməsi və özəlləşdirilməsi, dövlət və bələdiyyə əmlakı ilə bağlı hərracların təşkili, torpaq və qeyri-yaşayış sahələrinin icarəyə verilməsi, əmlakın qiymətləndirilməsi, daşınmaz əmlakın qeydiyyatı ilə bağlı müraciətlərin qəbulu, hazır sənədlərin təqdim edilməsi və digər xidmətlər) təqdim ediləcək. Burada həftənin bütün günləri 100-ə yaxın işçinin xidmətlər göstərməsi nəzərdə tutulur.
Məkanda elektron idarəetmə sistemini həyata keçirən qurğular quraşdırılıb. Vətəndaşlar elektron monitorlara daxil olmaqla xidmətlərdən internet vasitəsilə də istifadə edə bilirlər.
100 nəfərlik hərrac zalında monitorlar vasitəsilə özəlləşməyə çıxarılan əmlaklarla tanışlıq, keçirilən özəlləşdirmə hərraclarında həm canlı iştirak etmək, həm də elektron qoşulmaqla hərraca qatılmaq imkanları yaradılıb.
