Nazirlər Kabinetində müzakirələr
Nazirlər Kabinetinin 27 dekabr iclasında 2019-2024-cü illər üzrə kibertəhlükəsizlik strategiyasının layihəsi və ictimai əhəmiyyətli qurumlarda maliyyə hesabatlarının beynəlxalq standartlarının tətbiqi vəziyyəti barədə hesabat müzakirə olunub. Rəsmi məlumata görə, iclasa sədrlik edən baş nazir Novruz Məmmədov müzakirəyə çıxarılan kibertəhlükəsizlik strategiyasının beynəlxalq standartlara uyğun hazırlanmasının vacibliyini vurğulayıb. Novruz Məmmədov deyib ki, müasir dünya üçün ciddi təhdid olan kibercinayətkarlığın artması, BMT-nin hesabatına əsasən hər il 1,5 milyondan çox insanın internet vasitəsilə edilən cinayətlərin qurbanı olması faktı dövlət idarəçiliyi, bank, nəqliyyat, milli təhlükəsizlik və digər sistemlərin təkmilləşdirilməsini, kibermüdafiə tədbirlərinin genişləndirilməsini zəruri edir.
Gündəlikdə duran məsələlərə dair nəqliyyat, rabitə və yüksək texnologiyalar naziri Ramin Quluzadənin və maliyyə naziri Samir Şərifovun məruzələri dinlənilib.
Hər iki məsələ ətrafında müzakirələrdə müdafiə naziri Zakir Həsənov, Mərkəzi Bankın sədri Elman Rüstəmov, Dövlət Təhlükəsizliyi Xidmətinin rəisi Mədət Quliyev, Maliyyə Bazarlarına Nəzarət Palatası İdarə Heyətinin sədri vəzifəsini icra edən İbrahim Alışov və başqaları çıxış ediblər.
“Azərbaycan Respublikasının 2019-2024-cü illər üzrə kibertəhlükəsizlik strategiyası”nın razılaşdırılmış layihəsinin prezidentə təqdim olunması qərara alınıb.
Maliyyə Nazirliyi və Maliyyə Bazarlarına Nəzarət Palatası aidiyyəti təşkilatlarla birgə ikinci məsələ üzrə zəruri tapşırıqları özündə əks etdirən Nazirlər Kabineti sərəncamının layihəsini hazırlayacaq.
