Ticarətdə vergi necə yenilənir?
AZƏRTAC Vergilər Nazirliyinin media və kommunikasiya mərkəzinə istinadla pərakəndə ticarət fəaliyyəti ilə məşğul olan şəxslərin vergi öhdəliyi haqda arayış dərc edib.
Arayışda qeyd olunur ki, Vergi Məcəlləsində edilmiş dəyişikliklərə əsasən, 2019-cu il yanvarın 1-dən ticarət fəaliyyəti ilə məşğul olan şəxslərin 6 faizlik sadələşdirilmiş vergitutma metodunu seçmək hüququ ləğv edilib. 6 faiz dərəcə ilə sadələşdirilmiş vergi rejimində fəaliyyət göstərən və illik dövriyyəsi 200 000 manatdan artıq olan ticarət fəaliyyəti ilə məşğul şəxslər bu dövrdən əlavə dəyər vergisinin (ƏDV) ödəyicisi kimi fəaliyyət göstərəcəklər.
ƏDV istehlakçıya təqdim edilən məhsulun son qiymətinə əlavə olunmuş vergidir. Azərbaycanda 18%-lik ƏDV tətbiq olunur.
2019-cu il yanvarın 1-dək ticarət fəaliyyəti ilə məşğul olan və 6 faiz dərəcə ilə sadələşdirilmiş vergi ödəyicisi olmaq hüququndan istifadə edən vergiödəyiciləri həmin tarixdən 15 gün müddətində sahibliklərində qalan mallar barədə məlumatı qeydiyyatda olduqları vergi orqanına təqdim etməlidirlər.
Həmin məlumatları hər bir vergiödəyicisi bir dəfə təqdim edir və təqdim edildiyi tarixdən 3 iş günü müddətində, düzəlişlər istisna olmaqla, həmin məlumatların dəqiqləşdirilməsinə yol verilmir. Təqdim olunan məlumatlar malların uçota alınmasını təsdiq edən ilkin uçot sənədi hesab olunur və həmin mallara münasibətdə maliyyə sanksiyaları tətbiq edilmir.
Müvafiq məlumatı təqdim etmiş vergiödəyicilərinin sahibliklərində qalan malların təqdim olunması zamanı ƏDV 2019-cu il aprelin 1-dək həmin malların alış qiyməti ilə satış qiyməti arasındakı fərqdən hesablanır.
