Müsavatçını ev dustaqlığına buraxmadılar
Dekabrın 26-sı Xətai Rayon Məhkəməsində Müsavat Partiyasının üzvü Azad Həsənov barəsində seçilmiş həbs qətimkan tədbirinin ev dustaqlığı ilə əvəz olunmasına dair vəsatətə baxılıb.
Azad Həsənovun vəkili Osman Kazımov “Turan”a bildirib ki, məhkəmə vəsatəti təmin etməyib.
Vəkil qərardan apellyasiya şikayəti veriləcəyini söyləyib.
Osman Kazımov istintaq təcridxanasında Azad Həsənovun hüquqlarının pozulduğunu, ona doğmaları ilə görüş verilmədiyini də vurğulayıb.
Azad Həsənov 2003-cü ildən Müsavat Partiyasının üzvüdür. 2014-cü ilin fevralında o, Azərbaycandan mühacirət edib və ailəsi ilə birgə Litvadan siyasi sığınacaq alıb. O vaxtdan Litvada yaşayan Azad Həsənov 2018-ci il oktyabrın 10-da ağır xəstə olan atasına baş çəkmək üçün Azərbaycana gəlib. Həmin gün Bakıda tutulub, oktyabrın 12-də Xətai Rayon Məhkəməsi onun barəsində 4 ay müddətinə həbs qətimkan tədbiri seçib.
Azad Həsənov Cinayət Məcəlləsinin 234.4.3-cü (qabaqcadan əlbir olan bir qrup şəxs tərəfindən və ya mütəşəkkil dəstə tərəfindən qanunsuz olaraq külli miqdarda narkotik vasitələri, psixotrop maddələri və ya onların prekursorlarını hazırlama, istehsal etmə, saxlama, daşıma, göndərmə və ya satma) maddəsi ilə ittiham olunur. İttiham məhkəmədə sübuta yetirilərsə, onu əmlakı müsadirə edilməklə 5 ildən 12 ilədək həbs gözləyir.
Müsavat Partiyası bu həbsi hakimiyyətin qisasçılıq və repressiya siyasətinin tərkib hissəsi kimi qiymətləndirir.
