Cəbhəçi məhbusun karserə salındığı bildirilir
AXCP-nin həbsdə olan üzvü Fuad Əhmədlinin 16 saylı Cəzaçəkmə Müəssisəsində cərimə kamerasına (karser) salındığı bildirilir.
Məlumatı Azadliq.org-a Fuad Əhmədlinin ailə üzvləri çatdırıb. Onların dediyinə görə, Fuad Əhmədli karserə dekabrın 26-da üç günlüyə salınıb. Ailəsi Fuad Əhmədlinin karserə niyə salındığından xəbərsizdir.
Deyilənlərə aydınlıq gətirmək məqsədilə “Turan” agentliyi Penitensiar Xidmətin ictimaiyyətlə əlaqələr şöbəsinin rəisi Mehman Sadıqovla əlaqə saxlayıb. Mehman Sadıqov agentliyə bildirib ki, cəzaçəkmə müəssisəsinin daxili qaydalarını pozmağa görə məhkuma cəza vermək müəssisə rəhbərliyinin səlahiyyətindədir və Penitensiar Xidmət belə halları şərh etmir.
Fuad Əhmədlinin bundan əvvəl də bir neçə dəfə karsa salındığı bildirilmişdi. Ailəsi sonuncu dəfə onun bu ilin oktyabrında cərimə kamerasına salındığını açıqlamışdı.
Fuad Əhmədli 2016-cı il avqustun 18-də tutulub. O, operator işlədiyi “Azerfon” şirkətində abonentin şəxsi məlumatlarını başqasına ötürməkdə ittiham olunub. Bakı Ağır Cinayətlər Məhkəməsi Fuad Əhmədlini əməliyyat-axtarış fəaliyyəti qanunvericiliyini pozma və vəzifə səlahiyyətlərindən sui-istifadədə təqsirli bilərək 4 il müddətinə azadlıqdan məhrum edib. Apellyasiya instansiyası və Ali Məhkəmə cəzanı qüvvədə saxlayıb.
