Bir gümanın iki arqumenti
Hüquqşünas, Respublikaçı Alternativ Partiyasının xarici əlaqələr katibi Erkin Qədirli növbəti parlament seçkisinin demokratik keçiriləcəyini güman edir. Novator.az-ın məlumatına görə, Erkin Qədirli “Facebook” səhifəsində yazır ki, prezidentin Milli Məclisi buraxmaq səlahiyyəti bundan sonrakı parlamentlərin nisbətən demokratik seçiləcəyini düşünməyə əsas yaradır: “Bu səlahiyyət prezidentə önəmli və təsirli riskləri idarə etmək üçün gərəkdir. Belə risklər ancaq nisbətən demokratik seçki nəticəsində formalaşacaq parlamentdən qaynaqlana bilər. İndiki kimi sözəbaxan parlamentə qarşı belə bir səlahiyyətə ehtiyac yoxdur.
Bundan sonra parlamentdə təsdiqlənəsi neft-qaz anlaşmalarının qalmaması isə Qərbin böyük neft şirkətlərinin seçkilərlə bağlı qayğılarını önəmli dərəcədə azaldacaq. İndiyə qədər bütün parlament müddətləri ərzində hansısa önəmli anlaşma olurdu, onların parlamentdə sorğu-sualsız təsdiqlənməsi lazım gəlirdi. Qərbin neft şirkətləri demokratik parlament ehtimalını gərəksiz risk sayıb onun yaranmamasında maraqlı olublar. Bundan sonra işləri nisbətən rahat olacaq, demokratik parlament seçkiləri təsirli risk sayılmayacaq”.
Azərbaycan Konstitusiyasının 84-cü maddəsinə görə, Milli Məclisin hər çağırışının səlahiyyət müddəti 5 ildir, parlament seçkisi hər beş ildən bir noyabr ayının birinci bazar günü keçirilir. İndiki parlament 2015-ci il noyabrın 1-də seçilib, növbəti seçki 2020-ci ilin eyni gününə düşür.
2016-cı ildə konstitusiyaya əlavə olunmuş 98-1-ci maddəyə görə, Azərbaycan prezidenti Milli Məclisi buraxa bilər. Bu, Milli Məclisin eyni çağırışının bir il ərzində iki dəfə Nazirlər Kabinetinə etimadsızlıq göstərməsi; Konstitusiya Məhkəməsinin, Ali Məhkəmənin və Mərkəzi Bankın İdarə Heyətinin kollegial fəaliyyəti üçün zəruri olan sayda üzvlüyə namizədləri qanunla müəyyənləşmiş müddətdə təyin etməməsi hallarında və başqa bir neçə halda mümkündür (Milli Məclis necə buraxıla bilər?).
