Bakıya sərmayə 13,5 faiz azalıb
Bakı Şəhər Statistika İdarəsi paytaxtın sosial-iqtisadi göstəricilərini açıqlayıb. Novator.az bildirir ki, hesabata görə, 2018-ci ilin yanvar-noyabr aylarında sənayedə istehsal olunmuş malların və göstərilmiş xidmətlərin həcmi əvvəlki ilin müvafiq dövrü ilə müqayisədə 0,2 faiz artaraq 38,5 milyard manat olub. Sənayedə qeyri-dövlət sektorunun payı 84,6 faiz göstərilir.
11 ayda şəhərin iqtisadi və sosial sahələrinin inkişafı üçün əsas kapitala 11 milyard 31,6 milyon manat və ya əvvəlki ilin müvafiq dövrü ilə müqayisədə 13,5 faiz az vəsait yönəldilib. Ümumi sərmayənin 57,4 faizi dövlət, 42,6 faizi qeyri-dövlət sektorunun sərmayədarlarının payına düşüb.
Hesabata əsasən, yanvar-noyabr aylarında ticarət dövriyyəsinin həcmi 2017-ci ilin 11 ayı ilə müqayisədə 3,4 faiz, ictimai iaşə dövriyyəsi real ifadədə 6,9 faiz, əhaliyə göstərilən ödənişli xidmətlərin dəyəri 2,9 faiz artıb.
Bakı Şəhər Statistika İdarəsi bildirir ki, 2018-ci ilin yanvar-oktyabr aylarında işçilərin orta aylıq nominal əməkhaqqı əvvəlki ilin müvafiq dövrünə nisbətən 0,1 faiz artaraq 783,4 manata çatıb.
