Yasamal yaşayış kompleksi açılıb
Prezident İlham Əliyev dekabrın 26-sı Bakıda Dairəvi avtomobil yolu Şərifzadə küçəsi ilə birləşdirən yeni yolun, həmçinin Mənzil İnşaatı Dövlət Agentliyinin Yasamal yaşayış kompleksinin açılışında iştirak edib.
Dövlət başçısı ərazidə ümumi sahəsi 15,4 hektar olacaq yeni yaşayış kompleksinin təməlini qoyub, Yasamal rayonu ərazisində yenidən qurulan parkda yaradılan şəraitlə tanış olub.
Yasamal yaşayış kompleksinin ümumi sahəsi 11,6 hektardır. Ərazidə 29 yaşayış binası inşa olunub. Bu binalardan 12-si 12 mərtəbəli, 17-si 9 mərtəbəlidir. Kompleksdə mənzillərin ümumi sayı 1843 ədəddir. Burada 324 birotaqlı, 1052 ikiotaqlı, 467 üçotaqlı mənzil var.
Kompleksin baş planı üzrə 5 binada bu ilin sentyabrında “Elektron hökumət” portalı üzərindən “Güzəştli mənzil” sistemi vasitəsilə 324 mənzil satışa çıxarılıb. Bu mənzillərdən 278-nin alğı-satqısı başa çatıb.
