Maliyyə Sabitliyi Şurasının sədri dəyişdi, tərkibi yeniləndi
Prezident İlham Əliyev Maliyyə Sabitliyi Şurasının tərkibini dəyişib. Novator.az-ın məlumatına görə, dekabrın 25-də imzalanan fərmanla Maliyyə Sabitliyi Şurasının sədri postu prezidentin iqtisadi siyasət və sənaye məsələləri üzrə köməkçisi-şöbə müdirinə verilib. Şuranın üzvləri bu postları tutan şəxslərdir: prezidentin aqrar siyasət məsələləri üzrə köməkçisi-şöbə müdiri; birinci vitse-prezidentin iki köməkçisi; maliyyə naziri; iqtisadiyyat naziri; Mərkəzi Bankın sədri; Maliyyə Bazarlarına Nəzarət Palatasının İdarə heyətinin sədri; Dövlət Neft Fondunun icraçı direktoru.
Birinci vitse-prezidentin Katibliyinə Maliyyə Sabitliyi Şurasında təmsil olunacaq birinci vitse-prezidentin köməkçiləri barədə təkliflərini Maliyyə Sabitliyi Şurasına təqdim etmək tapşırılıb.
Maliyyə Sabitliyi Şurasını prezident İlham Əliyev 2016-cı il iyulun 15-də makroiqtisadi sabitliyi və maliyyə sabitliyini təmin etmək niyyəti ilə yaradıb. Sədrlik baş nazirə həvalə olunub, üzvlər sırasında prezidentin iqtisadi islahatlar üzrə köməkçisi; maliyyə naziri; iqtisadiyyat naziri; Mərkəzi Bankın sədri; Maliyyə Bazarlarına Nəzarət Palatasının Direktorlar Şurasının sədri; Dövlət Neft Fondunun icraçı direktoru yer alıb.
Şuranın cari fəaliyyətinin təşkili məqsədilə Katiblik yaradılıb və Katibliyin funksiyasının həyata keçirilməsi Mərkəzi Banka tövsiyə edilib. 25 dekabr 2018-ci il fərmanı ilə həmin norma ləğv olunub.
Maliyyə Sabitliyi Şurasının son iclası bu il dekabrın 11-də keçirilib. 9 ayın yekunlarına həsr edilmiş iclası baş nazir Novruz Məmmədov aparıb.
İndi sədrlik prezidentin iqtisadi siyasət və sənaye məsələləri üzrə köməkçisi-şöbə müdiri Natiq Əmirova keçib. 1967-ci ildə Şabran rayonunda anadan olan Natiq Əmirov Sankt-Peterburq Maliyyə-İqtisad İnstitutunu iqtisadçı, Təfəkkür Universitetini hüquqşünas ixtisası ilə bitirib.
Uzun illər vergi orqanlarında çalışıb, vergilər nazirinin müavini və birinci müavini postlarını tutub.
2016-cı il yanvarın 25-də Natiq Əmirov prezidentin iqtisadi islahatlar üzrə köməkçisi təyin edilib, ötən il iyunun 1-dən prezidentin iqtisadi siyasət və sənaye məsələləri üzrə köməkçisi-şöbə müdiridir.
