Zasın yolu açılır?
Kollektiv Təhlükəsizlik Müqaviləsi Təşkilatının (KTMT) mətbuat katibi Vladimir Zaynetdinov dekabrın 25-də açıqlama yayıb. Novator.az-ın məlumatına görə, açıqlamada qeyd olunur ki, KTMT-nin baş katibi postuna namizədliyi irəli sürülmüş Belarus təmsilçisi Stanislav Zas dekabrın 12-dən 20-dək Qırğızıstan, Qazaxıstan, Tacikistan, Belarus və Rusiya prezidentləri ilə görüşlər keçirib, bu görüşlərdə onun baş katib təyin olunması təklifi dəstəklənib.
Mətbuat katibi Stanislav Zasın Ermənistanın baş naziri əvəzi Nikol Paşinyanla görüşünün daha sonraya saxlandığını bəyan edib.
Məlumata görə, Kollektiv Təhlükəsizlik Şurasına sədrlik edən Qırğızıstan prezidenti Sooronbay Jeenbekovun göstərişi ilə KTMT Katibliyi Stanislav Zasın baş katib təyin olunması haqqında qərar layihəsi hazırlayıb və üzv ölkələrin müzakirəsinə təqdim edib.
Stanislav Zas 1964-cü ildə anadan olub. 1985-ci ildə Bakı Ali Ümumqoşun Komandirləri Məktəbini, 1996-cı ildə Belarus Hərbi Akademiyasını, 2005-ci ildə Rusiya Silahlı Qüvvələri Baş Qərargahının Hərbi Akademiyasını bitirib. 2015-ci ildən Belarus Təhlükəsizlik Şurasının dövlət katibidir. General-mayor rütbəsindədir.
Hərbi-siyasi birlik olan KTMT-yə Rusiya, Belarus, Ermənistan, Qazaxıstan, Qırğızıstan və Tacikistan daxildir. Qurumda ali vəzifəli şəxs olan baş katib postunu 2017-ci il mayın 2-dən erməni general-polkovnik Yuri Xaçaturov tutub. 2018-ci il oktyabrın 30-da o, Ermənistanın təşəbbüsü ilə vəzifədən uzaqlaşdırılıb. Baş katib səlahiyyətləri müvəqqəti olaraq müavin Valeri Semerikova verilib.
Ermənistan baş katib postuna sabiq müdafiə naziri Vaqarşak Arutyunyanı namizəd göstərib. Ancaq KTMT-nin digər üzvləri, əsasən də Belarusla Qazaxıstan Ermənistan nümayəndəsinin yenidən baş katib olmasını istəməyib. Noyabrın 8-i üzv ölkələrin liderlərinin daxil olduğu ali orqanın – Kollektiv Təhlükəsizlik Şurasının Astanada keçirilən iclasında baş katibi seçmək mümkün olmayıb və məsələ dekabrın 6-na – Sankt-Peterburq sammitinə saxlanıb. Ancaq həmin sammit təxirə salınıb, baş katib məsələsini işçi qaydada müzakirə ilə yoluna qoymaq qərara alınıb.
Qarabağın işğalında iştirak etmiş general baş katib oldu
Erməni generalın katibliyi bitdi, baş katibliyi başladı
Yuri Xaçaturova da iş qaldırıldı
KTMT: tarix, orqanlar, üzvlük qaydası
Erməni generalın postdan getməsi müzakirə olunub
Erməni general hərbi alyansdakı postunu itirdi
Baş katib seçimi dekabra qaldı
KTMT: baş katib postuna yeni namizəd kimdir?
Putin təklif edir, Paşinyan razılaşır
