Jurnalistin apellyasiya şikayətinə baxılıb
Dekabrın 24-də Bakı Apellyasiya Məhkəməsində Realliq.info saytının həbsdə olan baş redaktoru İkram Rəhimovun şikayətinə baxılıb.
İkram Rəhimovun bu şikayəti onun evində, avtomobilində axtarış aparılması, götürmənin həyata keçirilməsi, kompüter və telefon yaddaşına baxış keçirilməsi ilə bağlıdır. Jurnalist həmin prosedurların qanunsuz sayılması üçün Səbail Rayon Məhkəməsinə şikayət vermişdi. Dekabrın 13-də Səbail məhkəməsi şikayəti rədd edib.
Jurnalistin Səbail məhkəməsinin qərarından verdiyi apellyasiya şikayəti də təmin olunmayıb. Bakı Apellyasiya Məhkəməsinin hakimi Vaqif Mirsaqulovun sədrlik etdiyi məhkəmə kollegiyası Səbail məhkəməsinin qərarını qüvvədə saxlayıb.
İkram Rəhimovu oktyabrın 26-da Dövlət Təhlükəsizliyi Xidməti həbs edib. O, Cinayət Məcəlləsinin 182.2.1 və 182.2.2-ci (qabaqcadan əlbir olan bir qrup şəxs tərəfindən təkrarən hədə-qorxu ilə tələb etmə) maddələri ilə ittiham olunur. Baş redaktor ittihamları rədd edir.
