Sabiq baş nazirə yenə həbs cəzası kəsildi
İslamabad Antikorrupsiya Məhkəməsi dekabrın 24-də Pakistanın sabiq baş naziri Nəvaz Şərifə 7 il həbs cəzası kəsib. Nəvaz Şərif korrupsiyada təqsirli bilinir.
Sabiq baş nazirə korrupsiya ilə bağlı üç cinayət işi açılıb. Birinci məhkəmə çəkişməsi 2018-ci ilin iyulunda bitib. Həmin vaxt Nəvaz Şərifə 10 il həbs cəzası və 8 milyon dollar cərimə kəsilib.
Novator.az-ın məlumatına görə, məhkəmənin 24 dekabr dinləmələrində Nəvaz Şəriflə bağlı iki korrupsiya işinə baxış yekunlaşıb. Sabiq hökumət başçısı birinci iş üzrə 7 il həbs cəzasına və 2,5 milyon dollar cəriməyə məhkum edilib, ikinci iş üzrə bəraət alıb.
1949-cu il təvəllüdlü Nəvaz Şərif 1990-1993, 1997-1999, 2013-2017-ci illərdə baş nazir postunu tutub.
2016-cı ildə Nəvaz Şərifə korrupsiya ittihamı irəli sürülüb. 2017-ci il iyulun 28-də Ali Məhkəmə onu tutduğu vəzifəyə uyğun hesab etmədiyi üçün Nəvaz Şərif istefa verib.
Səidə Hüseynova
