Mustafa Hacıbəyli nəzarətə götürüldü
Bastainfo.com saytının baş redaktoru, Müsavat Partiyası mətbuat xidmətinin rəhbəri Mustafa Hacıbəyli dekabrın 23-də Binəqədi Rayon Polis İdarəsinin 5-ci bölməsində olub.
Azadliq.org-a açıqlamasında Mustafa Hacıbəyli deyib ki, bölmədə Bakı Şəhər Prokurorluğunun onun barəsində seçdiyi qərarla tanış olub. Qərar Mustafa Hacıbəylinin polis nəzarətinə götürülməsi haqdadır. Mustafa Hacıbəyli hər həftənin cümə günü polis bölməsinə gedib qeydiyyatdan keçməli, Bakı şəhərini tərk etmək istədikdə qabaqcadan polisə məlumat verməlidir.
Noyabrın 30-da Bakı Şəhər Prokurorluğu Mustafa Hacıbəyliyə Cinayət Məcəlləsinin 281.2 (dövlət əleyhinə çağırışlar), 309.2 (vəzifə səlahiyyətlərini aşma) və 313-cü (vəzifə saxtakarlığı) maddələri ilə ittiham irəli sürüb. Mustafa Hacıbəylinin polis nəzarətinə götürülməsi bu işlə əlaqədardır.
Cinayət işi üzrə məhkəmə prosesinin 2019-cu ilin yanvarında Bakı Ağır Cinayətlər Məhkəməsində başlanacağı gözlənir.
Mustafa Hacıbəyli ona qarşı ittihamları əsassız sayır, eyni zamanda vurğulayır ki, polis nəzarətinə götürülməsi onun məhkəmə qərarı olmadan da hərəkət hüququ və azadlığını məhdudlaşdırır.
Bu il iyulun 3-də Rusiya vətəndaşı Yunis Səfərov Gəncədə icra hakimiyyətinin başçısını odlu silahla öldürməyə cəhd göstərib. Hadisə zamanı başçı və bir polis əməkdaşı yaralanıb. Baş Prokurorluq iyulun 8-də açıqlama yayaraq qeyd edib ki, bəzi kütləvi informasiya vasitələrinin vəzifəli şəxsləri, həmçinin ayrı-ayrı şəxslər internet informasiya resurslarında Gəncədəki terror aktı ilə əlaqədar həqiqətə uyğun olmayan təxribat xarakterli məlumatlar yayıb. İddiaya əsasən, həmin məlumatlara ictimai rəyi çaşdırmaq, ictimai-siyasi sabitliyi pozmaq, terrorçuluğu dəstəkləyən, vətəndaşlar arasında dövlətin həyata keçirdiyi tədbirlərə inamsızlıq yaratmaq, cinayətkarlığa qarşı mübarizə sahəsində görülən işlərin üzərinə kölgə salmaq məqsədi ilə bilə-bilə yalan məlumatlar, eləcə də yayılması qanunla qadağan edilən informasiyalar daxil edilərək terrorçuluğa və hakimiyyətin zorla ələ keçirilməsinə və Azərbaycan Respublikasının konstitusiya quruluşunun zorla dəyişdirilməsinə yönələn açıq çağırışlar edilib.
8 iyul açıqlamasında Bastainfo.com saytının da adı hallanıb. Sayt bloklanıb, baş redaktor Mustafa Hacıbəyli Bakı Şəhər Prokurorluğunun bir neçə media orqanına qarşı qaldırdığı cinayət işinə cəlb olunub.
46 yaşlı Mustafa Hacıbəyli Qarabağ müharibəsi veteranı, III qrup əlildir. İndiki Dövlət İdarəçilik Akademiyasını bitirib, Şərqi Avropada Demokratiyanın İnkişafı İnstitutunun layihəsi əsasında Polşada jurnalistika sahəsi üzrə ixtisaslaşıb. “525-ci qəzet”də, “Yeni Müsavat” qəzetində çalışıb, “Demokrat” qəzetinin baş redaktoru olub. Bastainfo.com saytını 2015-ci ildə yaradıb.
