Büdcə qanunu və zərfində nələr var?
Prezident İlham Əliyev 2019-cu ilin dövlət büdcəsi qanununu imzalayıb. Sənəddə gəlirlər 23 milyard 168 min manat, xərclər 25 milyard 190 milyon manat göstərilir.
Gəlirlər istiqaməti üzrə ilk sırada Dövlət Neft Fondundan köçürmə dayanır: proqnoz 11 milyard 364,3 milyon manatdır.
Əlavə dəyər vergisindən 4 milyard 194 milyon manat, hüquqi şəxslərin mənfəət (gəlir) vergisindən 2 milyard 670,4 milyon manat, fiziki şəxslərin gəlir vergisindən 880 milyon manat daxilolma proqnozlaşdırılır.
Novator.az bildirir ki, 2019-cu ildə sənaye, tikinti və faydalı qazıntılara 6 milyard 390,7 milyon manat xərc çəkmək nəzərdə tutulur. Digər istiqamətlər üzrə xərc proqnozları belədir:
Ümumi dövlət xidmətləri – 3 milyard 886,7 milyon manat
Müdafiə – 3 milyard 37,6 milyon manat
Sosial müdafiə və sosial təminat – 2 milyard 620,4 milyon manat
Təhsil – 2 milyard 285,9 milyon manat
Məhkəmə hakimiyyəti, hüquq mühafizə və prokurorluq – 1 milyard 563,5 milyon manat
Səhiyyə – 1 milyard 42,5 milyon manat
Kənd təsərrüfatı, meşə təsərrüfatı, balıqçılıq, ovçuluq və ətraf mühitin mühafizəsi – 874,2 milyon manat
Mənzil və kommunal təsərrüfatı – 362,3 milyon manat
Mədəniyyət, incəsənət, informasiya, bədən tərbiyəsi və digər kateqoriyalara aid edilməyən sahədə fəaliyyət – 359 milyon manat
İqtisadi fəaliyyət – 393,2 milyon manat
Nəqliyyat və rabitə – 175,8 milyon manat
Yanacaq və enerji – 7,8 milyon manat
Əsas bölmələrə aid edilməyən xidmətlər – 2 milyard 190,3 milyon manat.
Prezident gələn ilin büdcə zərfinə daxil olan digər sənədləri də təsdiqləyib. Dövlət Sosial Müdafiə Fondunun 2019-cu il üzrə gəlirləri və xərcləri 3 milyard 928 milyon 104 min manat nəzərdə tutulur.
2019-cu il üçün yaşayış minimumu ölkə üzrə 180 manat, əmək qabiliyyətli əhali üçün 191 manat, pensiyaçılar üçün 149 manat, uşaqlar üçün 160 manat məbləğində müəyyən edilib.
Ünvanlı dövlət sosial yardımının təyin edilməsi məqsədilə 2019-cu il üçün ehtiyac meyarının həddi 143 manat məbləğində götürülüb.
İşsizlikdən sığorta fondunun 2019-cu il büdcəsinin gəlirləri və xərcləri 83 milyon 451 min 400 manat həddində rəsmiləşib.
