Saxta avro əməliyyatı: iki nəfər həbs edilib
Daxili İşlər Nazirliyinin məlumatına görə, Baş Mütəşəkkil Cinayətkarlıqla Mübarizə İdarəsinin əməkdaşları külli miqdarda saxta xarici valyutanı dövriyyəyə buraxan şəxsləri ifşa edib: “İdarəyə ölkə banklarının birindən Fərhad və Asəf adlı şəxslərin saxta 17 min avronu 32 min 606 manata mübadilə etmələri barədə bilgi daxil olub. Təqdim edilən 500 avroluq əsginazlardan ibarət pulların saxta olması müəyyənləşdiriləndən sonra təxirəsalınmaz əməliyyat-axtarış tədbiri həyata keçirilib. Cinayəti törətməkdə şübhəli bilinən Bakı şəhər sakini Asəf Novruzov və Lənkəran şəhər sakini Fərhad Həsənzadə görülmüş tədbirlərlə saxlanıblar.
Həmin şəxslərin paytaxtdakı ofislərindən əlavə olaraq saxta 25 min avro məbləğində əsginazlar və digər maddi sübutlar aşkarlanaraq götürülüb.
Saxlanan şəxslər ilkin ifadələrində saxta əsginazları valyuta mübadilə mərkəzlərində satmaq məqsədilə Türkiyədən gətirdiklərini bildiriblər. Ekspertizaya təqdim edilən 42 min avro yoxlanan zaman müəyyənləşdirilib ki, həmin pulların həqiqi əsginazlardan fərqlənməməsi üçün müdafiə nişanları və eskizləri xüsusi üsulla hazırlanıb. Bu səbəbdən ilk baxışdan həmin pulların saxta olmasını müəyyənləşdirmək mümkün deyil.
Faktla bağlı saxta pul və ya qiymətli kağızlar hazırlama, əldə etmə və ya satma ittihamı ilə cinayət işi başlanıb. Fərhad Həsənzadə və Asəf Novruzov barəsində məhkəmənin qərarı ilə həbs-qətimkan tədbiri seçilib”.
