Paşinyanın birinci müavini parlament sədri olur
Ermənistan hökumətinin başçısı Nikol Paşinyanın “Mənim addımım” bloku parlament sədri vəzifəsinə namizədini müəyyənləşdirib: Ararat Mirzoyan.
Bu il mayın 8-də baş nazir kürsüsünə oturan Vətəndaş Sazişi Partiyasının lideri Nikol Paşinyanın rəhbərlik etdiyi “Mənim addımım” bloku dekabrın 9-da keçirilmiş növbədənkənar seçkidə 132 deputatdan ibarət parlamentə 88 mandat qazanıb. Çiçəklənən Ermənistan Partiyası 26 mandat, İşıqlı Ermənistan Partiyası 18 mandat götürüb.
Novator.az-ın məlumatına görə, dekabrın 19-u axşam “Mənim addımım” blokunun yeni parlamentdə sədr postuna baş nazirin birinci müavini Ararat Mirzoyanı namizəd irəli sürəcəyi açıqlanıb.
Ararat Mirzoyan 1979-cu il noyabrın 23-ü Yerevanda anadan olub. Yerevan Dövlət Universitetinin tarix fakültəsini, Dövlət İdarəçiliyi Akademiyasını və Milli Elmlər Akademiyasının aspiranturasını bitirib. Tarix elmləri namizədidir.
Milli Elmlər Akademiyasında, Ermənistan Milli Arxivində, “Reqnum” agentliyində və başqa qurumlarda müxtəlif vəzifələr tutub, Yerevan Dövlət Universitetində dərs deyib.
2017-ci ildə parlamentin deputatı seçilib, 2018-ci il mayın 11-də baş nazirin birinci müavini təyin edilib.
Ararat Mirzoyan Vətəndaş Sazişi Partiyasının öncül şəxslərindən biridir, 9 dekabr seçkisində “Mənim addımım” blokundan parlamentə mandat alıb.
