Naxçıvanın sosial-iqtisadi göstəriciləri
Naxçıvan Muxtar Respublikasının sosial-iqtisadi göstəriciləri açıqlanıb. AZƏRTAC muxtar respublikanın Dövlət Statistika Komitəsinə istinadla bildirir ki, 2018-ci ilin yanvar-noyabr aylarında bölgədə 2,4 milyard manatlıq ümumi daxili məhsul istehsal olunub. Bu, 2017-ci ilin müvafiq dövrü ilə müqayisədə 1,2 faiz çoxdur. Adambaşına ümumi daxili məhsulun həcminin 5330 manata çatdığı vurğulanır.
Hesabata əsasən, 2017-ci ilin 11 ayı ilə müqayisədə sənaye üzrə 1,1 faiz, sərmayə üzrə 1,3 faiz, kənd təsərrüfatı üzrə 4,2 faiz, informasiya və rabitə xidmətləri üzrə 2,9 faiz artım qeydə alınıb.
11 ayda muxtar respublikanın hüquqi və fiziki şəxslərinə 47,8 milyon manat məbləğində kreditlər verilib. Bu, bir il öncəki göstəricidən 1,7 dəfə çoxdur.
Rəsmi məlumata görə, muxtar respublikada 383 növdə məhsul istehsal olunur, 108-i ərzaq, 242-si qeyri-ərzaq olmaqla 350 növdə məhsula tələbat tamamilə yerli imkanlar hesabına ödənir.
Yanvar-noyabr aylarında 435,6 milyon ABŞ dolları dəyərində xarici ticarət dövriyyəsi qeydə alınıb, ixrac idxalı 331 milyon dollar üstələyib.
Hesabatda qeyd olunur ki. yanvar-oktyabr aylarında muxtar respublika iqtisadiyyatında bir işçiyə hesablanmış orta aylıq əməkhaqqı 430 manata çatıb, bu da 2017-ci ilin müvafiq dövrü ilə müqayisədə 3,2 faiz çoxdur.
