Aqrar kreditlər üçün yeni qayda təsdiqlənib
Dekabrın 20-də fərman imzalayan prezident İlham Əliyev Kənd Təsərrüfatı Nazirliyi yanında Aqrar Kredit və İnkişaf Agentliyinin vəsaitindən istifadə qaydasını təsdiq edib.
Novator.az-ın məlumatına görə, agentliyin vəsaitindən istifadə istiqamətləri belə müəyyənləşib: kənd təsərrüfatı məhsullarının istehsalı, emalı, saxlanması və satışı proseslərinin təkmilləşdirilməsi ilə bağlı layihələrin maliyyələşdirilməsi; regionların aqrar inkişafı ilə bağlı innovativ layihələrin maliyyələşdirilməsi; kənd təsərrüfatı istehsal vasitələrinin təchizatının yaxşılaşdırılması ilə bağlı layihələrin, həmçinin onların güzəştli satışının və lizinqinin maliyyələşdirilməsi; heyvandarlıq təsərrüfatlarının dövlət-özəl tərəfdaşlığı tətbiq edilməklə inkişafı sahəsində layihələrin maliyyələşdirilməsi; Kənd Təsərrüfatı Nazirliyinin pilot layihələrinin maliyyələşdirilməsi.
Vəsaitdən istifadə şərtləri müvəkkil kredit təşkilatları ilə agentlik arasında bağlanan müqaviləyə əsasən tənzimlənir. Hər bir müvəkkil kredit təşkilatı üçün müəyyən edilən kredit xəttinin maksimum həcmi (limit) 5 milyon manatdır.
Sahibkarlıq subyektlərinə agentliyin vəsaiti hesabına bu hədlərdə güzəştli kreditlər verilə bilər: 5 min manatadək – mikrokreditlər; 30 min manatadək – kiçikhəcmli kreditlər; 100 min manatadək – ortahəcmli kreditlər; 200 min manatadək – irihəcmli kreditlər; 1 milyon manatadək – kənd təsərrüfatı istehsal vasitələrinin alınması üçün kreditlər.
Güzəştli kreditlərin müddətləri mikrokreditlər üçün 2 ilədək; kiçik və ortahəcmli kreditlər üçün 3 ilədək; irihəcmli kreditlər üçün 5 ilədəkdir.
