Növbəti mövsümün ilkin reqlamenti
UEFA-nın klub turnirlərinin növbəti mövsüm üzrə ilkin reqlamenti bəlli olub. Novator.az-ın məlumatına görə, İspaniya, İngiltərə, İtaliya və Almaniya milli futbol çempionatlarında 1-4-cü yeri tutan komandalar 2019-2020 mövsümündə Çempionlar Liqasına qrup mərhələsindən başlayacaq.
Fransa və Rusiya çempionatlarında 1-2-ci yeri tutan komandalar, Portuqaliya, Ukrayna, Belçika və Türkiyə çempionları da qrup mərhələsinə birbaşa vəsiqə alacaq.
Turnirdə beş ələmə mərhələsi var.
Cəbəllütariq, Andorra, San Marino və Kosovo çempionları təsnifat raundundan start götürəcək.
Birinci mərhələyə İsrail, Kipr, Rumıniya, Polşa, İsveç, Azərbaycan, Bolqarıstan, Serbiya, Şotlandiya, Belarus, Qazaxıstan, Norveç, Sloveniya, Slovakiya, Moldova, Albaniya, İslandiya, Macarıstan, Makedoniya, Finlandiya, İrlandiya, Bosniya, Latviya, Estoniya, Litva, Monteneqro, Gürcüstan, Ermənistan, Malta, Lüksemburq, Şimali İrlandiya, Uels, Farer adaları çempionları buraxılacaq.
İkinci mərhələdə yarışa Yunanıstan, Xorvatiya, Danimarka çempionları, Türkiyə, Avstriya, İsveçrə, Çexiya, Hollandiya, Yunanıstan çempionatlarında ikinci yeri tutan komandalar qoşulacaq.
Çexiya və Hollandiya çempionları, Fransa və Rusiya çempionatlarında 3-cü yeri, Portuqaliya, Ukrayna, Belçika çempionatlarında 2-ci yeri tutan komandalar turnirə üçüncü mərhələdən başlayacaq.
Dördüncü – sonuncu ələmə mərhələsində Avstriya və İsveçrə çempionları yer alacaq.
Avropa Liqasında da beş ələmə mərhələsi olacaq. Azərbaycan çempionatında 2-3-cü yeri tutan komandalar turnirə təsnifat raundundan sonrakı mərhələdən – birinci mərhələdən başlayacaq, ölkə kubokunun sahibi isə turnirə ikinci mərhələdən qoşulacaq.
