Ümumi təhsil: yeni qanun bir mərhələni keçdi
Dekabrın 18-də Milli Məclis “Ümumi təhsil haqqında” qanunu ilk oxunuşda qəbul edib. Novator.az bildirir ki, layihəyə görə, ümumi təhsilin səviyyələri bunlardır: məktəbəhazırlıq mərhələsi (5 yaş); ibtidai təhsil I-IV siniflər (6-10 yaş); ümumi orta təhsil V-IX siniflər (11-15 yaş); tam orta təhsil X-XI siniflər (16-17 yaş).
Ümumi təhsil müəssisələrinin bu növləri var: ibtidai ümumtəhsil məktəbi; ümumi orta ümumtəhsil məktəbi; tam orta ümumtəhsil məktəbi; lisey; gimnaziya; ümumtəhsil internat məktəbi; inteqrasiya təlimli internat tipli təhsil müəssisəsi; xüsusi məktəb və xüsusi internat məktəbi; inteqrasiya təlimli internat tipli gimnaziya; valideyn himayəsindən məhrum uşaqlar üçün ümumtəhsil internat məktəbi; digər məktəblər.
Layihəyə əsasən, ümumi təhsil müəssisələrində tədris dili dövlət dili – Azərbaycan dilidir. Azərbaycan dilinin üstünlüyünü təmin etmək şərti ilə digər dillərdə də tədris aparıla bilər. Belə ümumi təhsil müəssisələrində Azərbaycan dili, ədəbiyyatı, tarixi və cоğrafiyası tədris оlunmalıdır. Azərbaycan dilini zəif bilən təhsilalanlar üçün hazırlıq sinifləri və kursları təşkil olunur.
Ümumi təhsil müəssisəsi publik hüquqi şəxsdir və müstəqil balansa malikdir, inzibati və maliyyə-təsərrüfat fəaliyyətini sərbəst həyata keçirir.
İbtidai təhsil 6 yaşdan başlanır. Valideynlərin və ya digər qanuni nümayəndələrin müraciəti ilə hər təqvim ilinin sonunadək 6 yaşı tamam olan uşaqlar da məktəbə qəbul edilirlər.
Dövlət ümum təhsil müəssisələrində təhsil dövlət hesabına və ödənişli əsaslarla həyata keçirilir.
