Hüseyn Məlik həbsini sosial şəbəkə ilə əlaqələndirir
Dekabrın 18-də Bakı Apellyasiya Məhkəməsində Azərbaycan Demokratiya və Rifah Hərəkatı İdarə Heyətinin üzvü Hüseyn Məlikin şikayətinə baxılıb.
Hüseyn Məlik Səbail Rayon Məhkəməsinin dekabrın 5-də çıxardığı qərara əsasən polisin qanuni tələbinə tabe olmamaqda təqsirli bilinib və 25 sutka inzibati həbs cəzası alıb.
Azadliq.org xəbər verir ki, apellyasiya şikayətinə baxılarkən Hüseyn Məlik polisə müqavimət ittihamının əsassız olduğunu iddia edib, əslində sosial şəbəkədə yazdığı fikirlərinə görə tutulduğunu söyləyib.
Bakı Apellyasiya Məhkəməsinin hakimi Kamran Əkbərov şikayəti təmin etməyib, Səbail Rayon Məhkəməsinin qərarı qüvvədə qalıb.
