11 min manat ödənişi üzrə açıqlama
Əmək və Əhalinin Sosial Müdafiəsi Nazirliyinin 18 dekabr məlumatına görə, şəhid hərbi qulluqçulardan daha 263-ü üzrə 423 vərəsəyə birdəfəlik ödəmənin verilməsi qərarı qəbul edilib.
Prezident İlham Əliyevin bu il aprelin 19-da imzaladığı fərmana əsasən, 1997-ci il avqustun 2-dək Azərbaycanın ərazi bütövlüyü uğrunda həlak olmuş, ölmüş və hərbi əməliyyatlarla əlaqədar xəbərsiz itkin düşdüyünə görə ölmüş elan edilmiş hərbi qulluqçuların vərəsələrinə 11 min manat məbləğində birdəfəlik ödəmə verilir. Nazirliyin 18 dekabr məlumatında qeyd olunur ki, 2897 şəhid hərbi qulluqçu üzrə 3856 vərəsəyə birdəfəlik ödəniş verilməsi barədə qərarlar rəsmiləşib.
1997-ci il avqustun 2-də “Hərbi qulluqçuların dövlət icbari şəxsi sığortası haqqında” qanun qüvvəyə minib və həmin dövrdən sonra hərbi qulluqçuların həlak olması, itkin düşməsi və ya xəsarət alması zamanı sığorta ödənişlərinin verilməsi həyata keçirilib.
