Paşinyan yeni parlamentə 88 mandat qazanıb
Ermənistanda dekabrın 9-da keçirilmiş növbədənkənar parlament seçkisinin nəticələri təsdiqlənib. Novator.az bildirir ki, Mərkəzi Seçki Komissiyası baş nazir səlahiyyətlərinin icraçısı Nikol Paşinyanın “Mənim addımım” blokunun 70,4 faiz səslə qalib gəldiyini bəyan edib.
Çiçəklənən Ermənistan Partiyası parlamentə 8,3 faiz səslə, İşıqlı Ermənistan Partiyası 6,3 faiz səslə düşüb.
“Mənim addımım” bloku 132 deputatdan ibarət yeni parlamentdə 88 mandatla təmsil ediləcək.
Çiçəklənən Ermənistan Partiyası 26 mandat, İşıqlı Ermənistan Partiyası 18 mandat götürüb.
Ermənistan Konstitusiyasına görə, ölkə parlamenti azı 101 nəfərdən ibarət olmalıdır. 2017-ci ildə seçilmiş parlamentin 105 üzvü vardı.
Nikol Paşinyan Vətəndaş Sazişi Partiyasının lideridir. 2017-ci ilin parlament seçkisində Vətəndaş Sazişi Partiyası daha iki partiya ilə birgə “Çıxış” bloku yaradıb. Blok 105 nəfərlik parlamentə 9 mandat qazanıb.
2018-ci il martın 31-dən Nikol Paşinyan Ermənistanın bir çox şəhəri boyunca prezident Serj Sərkisyanın baş nazir olmaq niyyətinə qarşı yürüş keçirib. Aprelin 13-dən Yerevanda onun başçılığı ilə keçirilən davamlı aksiyalarda Serj Sərkisyanın hakimiyyətdən getməsi tələb edilib.
Serj Sərkisyan aprelin 17-də baş nazir kürsüsünə oturub, ancaq aprelin 23-də istefa verib.
Mayın 8-dən baş nazir postuna Nikol Paşinyan keçib. Oktyabrın 16-da o, növbədənkənar parlament seçkisinə yol açmaq üçün istefa verib, ancaq baş nazir səlahiyyətlərinin icraçısı olaraq qalır.
