Aqrar tədarük işi başqa quruma tapşırıldı
Prezident İlham Əliyev fərman imzalayaraq “Ərzaq Məhsullarının Tədarükü və Təchizatı” Açıq Səhmdar Cəmiyyətini ləğv edərək onun bazasında Kənd Təsərrüfatı Nazirliyinin tabeliyində səhmləri dövlətə məxsus “Aqrar Tədarük və Təchizat” Açıq Səhmdar Cəmiyyətini yaradıb. Yenilik kənd təsərrüfatı məhsullarının istehsalını və emalını stimullaşdırmaq, dövlət sifarişi ilə kənd təsərrüfatı və ərzaq məhsullarının satın alınmasının mərkəzləşdirilmiş qaydada təşkili ilə bağlı həyata keçirilən işlərin səmərəliliyini daha da artırmaq və sistemliliyini təmin etmək zərurəti ilə əsaslandırılıb.
“Aqrar Tədarük və Təchizat” Açıq Səhmdar Cəmiyyəti dövlət sifarişi ilə kənd təsərrüfatı və ərzaq məhsullarının istehsalçılardan və satıcılardan mərkəzləşdirilmiş qaydada satın alınmasını və ixracını, habelə tədarük edilərək satınalan təşkilatların müraciətləri əsasında onlara təqdim edilməsini həyata keçirən, eləcə də qeyd olunan istiqamətlərdə fəaliyyətin təşkili ilə bağlı digər tədbirlər görülməsini təmin edən kommersiya hüquqi şəxsidir. Qurumun fəaliyyətinə ümumi rəhbərliyi və nəzarəti üç üzvdən ibarət İdarə Heyəti həyata keçirir. İdarə Heyətinin sədrini və digər üzvlərini vəzifəyə təyin etmək kənd təsərrüfatı nazirinin səlahiyyətindədir.
Yeni qurum dövlət qeydiyyatına alındığı günədək “Ərzaq Məhsullarının Tədarükü və Təchizatı” Açıq Səhmdar Cəmiyyəti öz fəaliyyətini davam etdirəcək.
