Xələf Xələfovun vəzifəsi dəyişdi
Prezident İlham Əliyev Xələf Xələfovu xarici işlər nazirinin müavini vəzifəsindən azad edib. Sərəncam dekabrın 13-də imzalanıb. Elə həmin gün Xələf Xələfov baş nazir Novruz Məmmədovun sərəncamı ilə Nazirlər Kabineti Aparatının rəhbəri vəzifəsinə təyinat alıb.
Əsasnaməsinə görə, Nazirlər Kabinetinin Aparatı ali kateqoriyalı dövlət orqanıdır. Aparat Prezident Administrasiyası və mərkəzi icra hakimiyyəti orqanları ilə qarşılıqlı əlaqəli surətdə fəaliyyət göstərir, bilavasitə baş nazirə və onun müavinlərinə tabedir, onun rəhbərini baş nazir prezidentlə razılaşdırıb təyin edir.
Novator.az bildirir ki, Xələf Xələfov 1959-cu ildə Ermənistanda anadan olub. 1982-ci ildə Kiyev Dövlət Universitetini, 1991-ci ildə SSRİ Xarici İşlər Nazirliyinin Diplomatik Akademiyasını bitirib.
1983-1990-cu illərdə Azərbaycanın Daxili İşlər Nazirliyində çalışıb.
1991-ci ildən Azərbaycan Xarici İşlər Nazirliyinin Konsulluq İdarəsinin 2-ci katibi, 1992-ci ildən Müqavilə-Hüquq İdarəsinin rəisi olub.
1997-ci ildən xarici işlər nazirinin müavini idi.
