Tamerlan Qarayev Litva yolunda
Prezident İlham Əliyev Tamerlan Qarayevi Azərbaycanın İndoneziya, Filippin, Sinqapur və Şərqi Timorda səfir, Cənub-Şərqi Asiya Dövlətləri Assosiasiyası yanında daimi nümayəndəliyin başçısı vəzifələrindən geri çağırıb. Dekabrın 13-də imzalanan digər sərəncamla Tamerlan Qarayev Azərbaycanın Litvada səfiri təyin edilib.
Novator.az bildirir ki, Tamerlan Qarayev 1952-ci il yanvarın 30-da Ağdam rayonunun Qasımlı kəndində anadan olub. Azərbaycan Dövlət Universitetinin (indiki BDU) hüquq fakültəsini bitirib.
1973-1978-ci illərdə Bakı Şəhər Prokurorluğunda xidmət edib.
1978-1991-ci illərdə Azərbaycan Dövlət Universitetində müəllim, baş müəllim, dosent, dekan müavini postlarını tutub.
Tamerlan Qarayev milli azadlıq hərəkatının öncül şəxslərindən biridir, Azərbaycan Xalq Cəbhəsi Ali Məclisinin sədri olub.
1991-ci ildən parlament sədrinin müavini, 1992-ci ildən birinci müavini vəzifələrində çalışıb.
Hüquq elmləri namizədidir.
1993-cü ildən Tamerlan Qarayev Azərbaycanın Çində səfiri, 2004-cü ildən Hindistanda səfiri (2006-cı ildən eyni zamanda Nepalda, Şri-Lankada, Banqladeşdə, 2007-ci ildən Maldivdə) olub.
2011-ci ildə Tamerlan Qarayev İndoneziyaya səfir təyin edilib, həmin il eyni zamanda Cənub-Şərqi Asiya Dövlətləri Assosiasiyası yanında daimi nümayəndəliyin başçısı statusu alıb, 2012-ci ildən Azərbaycanı Filippin, Sinqapur və Şərqi Timorda da təmsil edib.
