Sərmayədə azalma, sənayedə artım
Dövlət Statistika Komitəsi sərmayə hesabatı yayıb. Novator.az-ın məlumatına görə, rəsmi açıqlamada bildirilir ki, 2018-ci ilin yanvar-noyabr aylarında Azərbaycanın iqtisadi və sosial sahələrinin inkişafı üçün əsas kapitala 12 milyard 899,4 milyon manat və ya əvvəlki ilin 11 ayı ilə müqayisədə 8,8 faiz az vəsait yönəldilib.
Daxili mənbələrdən əsas kapitala yönəldilmiş vəsait ümumi sərmayənin 63,1 faizinə bərabər olub.
Əsas kapitala yönəldilmiş sərmayənin ümumi dəyərində müəssisə və təşkilatların vəsaitləri 50,4 faiz, bank kreditləri 12,6 faiz, büdcə vəsaitləri 27,2 faiz, əhalinin şəxsi vəsaitləri 7,1 faiz, büdcədənkənar fondların vəsaitləri 2 faiz, sair vəsaitlər 0,7 faiz təşkil edib.
Qeyri-neft sektoruna yönəldilmiş vəsaitin həcmi 21,2 faiz artıb.
Başqa bir hesabata əsasən, sənaye müəssisələri və bu sahədə fəaliyyət göstərən fərdi sahibkarlar yanvar-noyabr aylarında 44 milyard manatlıq və ya əvvəlki ilin müvafiq dövrü ilə müqayisədə 1,4 faiz çox sənaye məhsulu istehsal edib. Sənayenin qeyri-neft sektorunda 9,1 faiz, neft sektorunda 0,3 faiz artım qeydə alınıb.
