Sərhədçilər ilə yekun vurdu
Dekabrın 14-ü Dövlət Sərhəd Xidmətində 2018-ci ilin yekunlarına həsr olunmuş hesabat müşavirəsi keçirilib. Rəsmi məlumata görə, müşavirədə məruzə ilə çıxış edən Dövlət Sərhəd Xidmətinin rəisi general-polkovnik Elçin Quliyev deyib ki, bu il xarici xüsusi xidmət orqanları ilə əlaqədə şübhəli bilinən 19 nəfər, məxfi əməkdaşlığa cəlb olunmuş 3 nəfər müəyyən edilib.
Hesabata əsasən, xarici münaqişə zonalarında döyüşmüş 8 nəfərin şəxsiyyəti müəyyən olunub, 5 nəfər Azərbaycan vətəndaşı saxlanıb, qanunsuz miqrasiya ilə məşğul olan 9 qrup, qaçaqmalçılıq, narkotik vasitələrin qanunsuz dövriyyəsi ilə məşğul olan 16 mütəşəkkil cinayətkar dəstə zərərsizləşdirilib.
Elçin Quliyev deyib ki, dövlət sərhədini pozan 574 nəfər, sərhədboyu rejim qaydalarını pozan 12 min 701 nəfər, axtarışda olan 5561 nəfər tutulub.
38 milyon 279,8 min manat dəyərində qaçaqmalın, 1 ton 215 kiloqram 325 qram narkotik vasitənin dövlət sərhədindən qanunsuz keçirilməsinin qarşısının alındığı bildirilir.
İl ərzində sərhəd naryadlarına qarşı 3 halda silahlı müqavimət göstərilib, sərhəd pozucularına qarşı təlimata uyğun silah tətbiq edilib, hadisə yerində iki halda avtomat silah, bir halda 2 ədəd gecəgörmə cihazı aşkar olunub.
