Maliyyə Sabitliyi Şurası yeni hesabat verib
Mərkəzi Bank 2016-cı il iyulun 15-də yaradılmış Maliyyə Sabitliyi Şurasının 11 dekabr 2018-ci il iclasından məlumat yayıb. Qeyd olunur ki, 9 ayın yekunlarına həsr edilmiş iclası baş nazir, Maliyyə Sabitliyi Şurasının sədri Novruz Məmmədov aparıb.
Hesabata əsasən, 9 ayda ümumi daxili məhsul qeyri-neft sektoru üzrə 1% artıb: “Qeyri-neft sənayesində 10,8%, kənd təsərrüfatında 4,3%, informasiya və rabitə xidmətlərində 7,7%, ticarətdə 2,7%-lik artıma nail olunub.
İqtisadiyyatın və sosial sahələrin inkişafı istiqamətində əsas kapitala 10,1 milyard manat investisiya yönəldilib. Sərmayə keçən ilin müvafiq dövrü ilə müqayisədə qeyri-neft sektoru üzrə 20,2%, qeyri-neft sənayesi üzrə 24,4% artıb. Əhalinin gəlirləri 9,5% artmaqla inflyasiyanı 6,9% üstələyib.
2018-ci ilin 9 ayında ölkənin xarici sektor göstəriciləri yaxşılaşıb. Cari əməliyyatlar hesabının profisiti 5,1 milyard ABŞ dolları olmaqla ÜDM-in 15%-ni təşkil edib. Xarici sektor üzrə fundamental amillərin təsirləri fonunda valyuta bazarında tarazlıq qorunub, milli valyutanın məzənnəsi sabit olub. Ölkənin strateji valyuta ehtiyatları dövr ərzində 7,6% artaraq 45 milyard ABŞ dollarına çatıb.
9 ayda dövlət büdcəsinin gəlirləri 101,3%, xərcləri 98% icra olunub, 423,7 milyon manat məbləğində artıqlıq yaranıb.
Həyata keçirilən effektli makroiqtisadi siyasət şəraitində orta illik inflyasiya 2,6% təşkil edib.
Manatla geniş pul kütləsi 8,3%, iqtisadiyyata kredit qoyuluşları 4,6%, fiziki şəxslərin depozitləri 8,4% artıb”.
