İşğalçı rejimdə yeni “müdafiə naziri”
İşğalçı Dağlıq Qarabağ rejiminin “müdafiə naziri” dəyişib. Novator.az-ın məlumatına görə, Levon Mnasakanyanı Karen Abramyan əvəzləyib.
General-mayor Levon Mnasakanyan “müdafiə naziri” postunu 2015-ci ildən tuturdu.
Dekabrın 14-də işğalçı rejimin başçısı Bako Saakyan yeni “naziri” ordu rəhbərliyinə təqdim edib. General-mayor Karen Abramyan bu təyinata qədər işğalçı ordunun qərargah rəisi idi. Qərargah rəisi postuna dekabrın 14-də Cəlal Arutyunyan təyin edilib.
Bako Saakyanın dekabrın 14-də imzaladığı digər sənədlərlə Karen Sərkisyan “Fövqəladə Hallar Xidmətinin direktoru” postundan “prezidentin xüsusi tapşırıqlar üzrə nümayəndəsi” postuna keçirilib. Levon Mnasakanyan “Fövqaladə Hallar Xidmətinin direktoru” təyin edilib. Murad Petrosyan “prezidentin xüsusi tapşırıqlar üzrə nümayəndəsi” vəzifəsindən çıxarılıb.
1988-ci ilin fevralında Azərbaycanın Dağlıq Qarabağ vilayətinin Ermənistana verilməsi tələbi ilə separatçı hərəkat, hərbi təcavüz başlayıb. 1991-ci il sentyabrın 2-də ermənilər Dağlıq Qarabağı “müstəqil dövlət” elan edib, işğalçı müharibə alovlanıb. 1994-cü ilin mayında atəşkəslə dayanan müharibədə Ermənistan Dağlıq Qarabağı və onun ətrafındakı 7 rayonu işğal edib.
