“Həbsxana həyatını kitabsız təsəvvür etmək mümkün deyil”
“Bəzən hər həftə, bəzən iki həftədən bir görüşürük. Səhhəti və əhvalı yaxşıdır. Günlərini kitab oxumaqla keçirir. Həbsxana həyatını kitabsız təsəvvür etmək mümkün deyil”. Bunu Novator.az-a məhbus jurnalist Seymur Həzinin həyat yoldaşı Nigar Həzi deyib.
“Azadlıq” qəzetinin əməkdaşı, AXCP-nin öncül şəxslərindən olan Seymur Həzi 2014-cü il avqustun 29-da tutulub. Məhərrəm Həsənov adlı şəxsə xəsarət yetirməkdə ittiham olunan jurnalist Abşeron Rayon Məhkəməsinin hökmü ilə 5 il müddətinə azadlıqdan məhrum edilib. Seymur Həzi ittihamı rədd edir və hakimiyyəti tənqid edən yazılarına, çıxışlarına görə həbs olunduğunu bildirir.
2018-ci il dekabrın 6-da Avropa İnsan Hüquqları Məhkəməsi Seymur Həzinin işi üzrə şikayətə baxıb və jurnalistin azadlıq və toxunulmazlıq hüququnun pozulduğunu tanıyıb. Məhkəmə Azərbaycan dövlətinin Seymur Həziyə 14 min 500 avro təzminat ödəməsi barədə qərar çıxarıb.
Nigar Həzi Novator.az-a açıqlamasında deyib ki, Seymur Həzi Avropa Məhkəməsinin qərarını sevinclə qarşılayıb: “Əslində gecikmiş qərardır, amma qismən də olsa ədalətlidir”.
Seymur Həzi Bakıdakı 17 saylı Cəzaçəkmə Müəssisəsində saxlanır.
Seymur və Nigar 2016-cı ilin avqustunda ailə qurublar.
Əşrəf Fəxri
