Tereza Mey gedir, amma indi yox
Böyük Britaniyanın baş naziri Tereza Mey lideri olduğu hakim Mühafizəkarlar Partiyasının parlament fraksiyasındakı etimad səsverməsini udub. Novator.az-ın məlumatına görə, dekabrın 12-si axşam keçirilən səsvermədə İcmalar Palatasındakı 200 mühafizəkar Tereza Meyi dəstəkləyib, 117 deputat onun partiya lideri və baş nazir postlarından getməsinə tərəfdar olub.
Tereza Mey partiyadaşlarına 2022-ci ilin parlament seçkisində baş nazirliyə iddia etməmək vədi verib.
Etimad səsverməsi Böyük Britaniyanın Avropa İttifaqından ayrılması şərtləri ilə bağlı fikir ayrılıqlarından doğub. Böyük Britaniya Avropa İttifaqından 2019-cu il martın 29-da ayrılmalıdır.
2016-cı il iyunun 23-də Böyük Britaniyada ölkənin Avropa İttifaqında qalıb-qalmamasını müəyyənləşdirən referendum keçirilib. Referenduma qatılanların çoxu Britaniyanın Avropa İttifaqından çıxmasına səs verib. Avropa İttifaqında qalmaq tərəfdarı olan baş nazir Devid Kemeron istefaya gedib. İyulun 13-də Tereza Mey baş nazir postuna təyin edilib. 2017-ci il iyunun 8-də keçirilmiş növbədənkənar parlament seçkisindən sonra Tereza Meyin Mühafizəkarlar Partiyası yenidən hökumət qurub.
Tereza Mey 1956-cı il oktyabrın 1-də İstborn şəhərində doğulub. Oksford Universitetini bitirib. Gənc yaşlarında İngiltərə Bankında və Londonun özünüidarə orqanlarında işləyib.
2010-cu ildən Devid Kemeron hökumətində qadın və bərabərlik məsələləri naziri postunu tutub, sonradan daxili işlər naziri olub. 1997-ci ildən İcmalar Palatasının deputatıdır.
Mühafizəkarlar Partiyasına 1997-ci ildə qoşulub, 2016-cı il iyulun 11-dən qurumun lideridir.
1957-ci ildə yaradılmış Avropa İttifaqının Böyük Britaniyadan başqa 27 üzvü var: Almaniya, Avstriya, Belçika, Bolqarıstan, Çexiya, Danimarka, Estoniya, Finlandiya, Fransa, Xorvatiya, İrlandiya, İspaniya, İsveç, İtaliya, Kipr, Latviya, Litva, Lüksemburq, Macarıstan, Malta, Niderland, Polşa, Portuqaliya, Rumıniya, Slovakiya, Sloveniya, Yunanıstan.
