Birdəfəlik ödəmə statistikası
Prezident İlham Əliyevin 19 aprel 2018-ci il fərmanını icra edən Əmək və Əhalinin Sosial Müdafiəsi Nazirliyi dekabrın 13-də yeni açıqlama yayıb. Məlumata görə, daha 1115 şəhid hərbi qulluqçunun 1519 vərəsəsinə birdəfəlik ödəmənin verilməsi qərarı qəbul edilib.
Prezident İlham Əliyevin aprelin 19-da imzaladığı fərmana əsasən, 1997-ci il avqustun 2-dək Azərbaycanın ərazi bütövlüyü uğrunda həlak olmuş, ölmüş və hərbi əməliyyatlarla əlaqədar xəbərsiz itkin düşdüyünə görə ölmüş elan edilmiş hərbi qulluqçuların vərəsələrinə 11 min manat məbləğində birdəfəlik ödəmə verilir. Ödəməyə məsul olan Əmək və Əhalinin Sosial Müdafiəsi Nazirliyi oktyabrın 9-dan sənəd qəbuluna başlayıb. Nazirliyin 13 dekabr məlumatına görə, 9531 şəhid hərbi qulluqçunun vərəsələrinin birdəfəlik ödəmə almaq hüququ müəyyən olunub, 2338 şəhid hərbi qulluqçu üzrə 3038 vərəsəyə birdəfəlik ödəniş verilməsi barədə qərarlar qəbul edilib.
1997-ci il avqustun 2-də “Hərbi qulluqçuların dövlət icbari şəxsi sığortası haqqında” qanun qüvvəyə minib və həmin dövrdən sonra hərbi qulluqçuların həlak olması, itkin düşməsi və ya xəsarət alması zamanı sığorta ödənişlərinin verilməsi həyata keçirilib.
