Avropa Məhkəməsi Azərbaycanı 64 min avro cərimələdi
Dekabrın 13-də Avropa İnsan Hüquqları Məhkəməsi Azərbaycanın 11 vətəndaşının şikayəti üzrə qərarını elan edib.
Meydan.tv-nin xəbərinə görə, şikayətçilər bunlardır: jurnalistlər Aytən Ələkbərova (Fərhadova), İzolda Ağayeva, Gülər Mehdizadə, Aynurə Heydərova, Aynurə İmranova; hüquqşünaslar Ənnağı Hacıbəyli, Rövşanə Rəhimova; siyasətçi Azər Qasımlı; fəaliyyəti dayandırılmış Beynəlxalq Universitetin rektoru Elşad Abdullayevin bacısı oğlu Azad Mürsəliyev; Azərbaycan Beynəlxalq Bankının İdarə Heyətinin sabiq sədri, məhbus Cahangir Hacıyevin bacısı Əminə Hacıyeva; Dilarə Vəliyeva.
Adıçəkilən şəxslər Avropa Məhkəməsinə ərizələrində iddia ediblər ki, Azərbaycanda istintaq olunan müəyyən cinayət işlərində adları şahid kimi keçsə də, hüquq mühafizə orqanları onların ölkədən çıxışına yasaq qoyub.
Avropa Məhkəməsi belə qərara gəlib ki, şikayətçilərin sərbəst hərəkət etmək hüququ, Aynurə İmranova istisna olmaqla digərlərinin səmərəli müdafiə vasitələrindən yararlanmaq hüququ da pozulub.
Məhkəmə Azərbaycan hökumətini ümumilikdə 64 min avro məbləğində cərimələyib. Qərara əsasən, hökumət hər şikayətçiyə mənəvi zərərə görə 5000 avro, məhkəmə xərclərinə görə isə 1000 avro (Rövşanə Rəhimli və Əminə Hacıyeva istisna olmaqla) ödəməlidir.
