145 mənzil hədiyyə olundu
Əmək və Əhalinin Sosial Müdafiəsi Nazirliyi Abşeron rayonunun Məmmədli kəndində yeni yaşayış binalarından alınmış 145 mənzili şəhid ailələrinə, Qarabağ müharibəsi və 20 Yanvar əlillərinə təqdim edib. 13 dekabr mərasimində çıxış edən əmək və əhalinin sosial müdafiəsi nazirinin müavini Vüsal Nəsirli deyib ki, dövlət başçısının 2 avqust 2018-ci il sərəncamı ilə şəhid ailələri və Qarabağ müharibəsi əlilləri üçün əlavə olaraq minimum 300 mənzilin alınması üçün 20 milyon manat vəsait ayrılıb, bu, həmin kateqoriyalardan insanlara nəzərdə tutulduğundan 2,8 dəfə çox olmaqla 600-ə yaxın mənzilin təqdim edilməsinə imkan verib.
Vüsal Nəsirli qeyd edib ki, şəhid ailələrinə və əlilliyi olanlara təqdim edilən mənzillərin sayı 6123-ə çatır: “Onların 5,7 minə yaxını ölkənin ərazi bütövlüyünün, müstəqilliyinin və konstitusiya quruluşunun müdafiəsi uğrunda döyüşlərdə fiziki sağlamlıqlarını itirmiş insanlar və şəhid ailələridir. Bu ay ərzində Bakı və Abşeronda yeni mənzillərin, İmişlidə 54 mənzilli, Şamaxıda 36 mənzilli yaşayış binalarının, ayrı-ayrı rayon və şəhərlərdə də tikintisi başa çatan fərdi yaşayış evlərinin istifadəyə verilməsi planlaşdırılıb”.
