Qurbanlı nəticələr
AFFA İcraiyyə Komitəsinin 8 dekabr iclasında Azərbaycan milli komandasının baş məşqçisi Qurban Qurbanovla müqaviləyə vaxtından əvvəl xitam verilib. 2017-ci il noyabrın 3-də 6 illik müqaviləyə imza atmış Qurban Qurbanov “Qarabağ” klubunun baş məşqçi postunu da əlində saxlamışdı.
İcraiyyə Komitəsi bəyan edib ki, Qurban Qurbanovla yolları Azərbaycan milli komandasının 2018-ci ildə göstərdiyi nəticələri nəzərə alaraq və ona “Qarabağ” klubuna daha çox vaxt ayırmağa imkan yaratmaq məqsədilə ayırır.
Novator.az bildirir ki, bu il milli komanda Qurban Qurbanovun rəhbərliyi altında 6 yoldaşlıq görüşü keçirib.
Yanvarda Türkiyənin Antalya şəhərində Moldova millisi ilə görüş qolsuz bitib.
Martda Belarusla Bakıdakı oyunda qonaqlar 1:0 üstün olublar, Antalyada Makedoniya yığması ilə matç heç-heçə bitib – 1:1.
Yığma mayda Bakıda Qırğızıstan millisinin qapısına 3 cavabsız top vurub.
İyunda Astanada Qazaxıstanın qonağı olan milli komanda 0:3 hesabı ilə uduzub, Riqada Latviya millisinə üstün gəlib – 3:1.
Qalan 6 matç sentyabr-noyabr aylarında UEFA Millətlər Liqası çərçivəsində keçirilib. D divizionunun 3-cü qrupunda yarışan Azərbaycan Kosovo ilə 0:0 və 0:4, Malta ilə iki dəfə 1:1, Farer adaları ilə 2:0 və 3:0 nəticələrinə imza atıb. Qrupu 9 xalla ikinci sırada bitirən yığma C divizionuna yüksələ bilməyib.
Ümumilikdə Qurban Qurbanovla 12 oyunun 4-ü qələbə, 5-i bərabərlik, 3-ü məğlubiyyətlə bitib. Yığma 14 top vurub, 12 top buraxıb.
Qurban Qurbanov 1972-ci ildə Zaqatalanın Aşağı Tala kəndində doğulub. Futbolçu karyerası ərzində Azərbaycanın “Daşqın”, “Turan”, “Kür-Nur”, “Neftçi”, “İnter”, Gürcüstanın “Mertsxali”, “Alazani”, Rusiyanın “Dinamo” (Stavropol), “Fakel”, “Baltika”, “Volqar” klublarında və Azərbaycanın milli komandasında hücumçu mövqeyində çıxış edib.
2006-cı ildə futbolçu karyerasını başa vuran Qurban Qurbanov əvvəl Bakının “İnter” klubunun idman direktoru vəzifəsində çalışıb, sonra “Neftçi”də baş məşqçi və idman direktoru vəzifələrini tutub. 2008-ci ildən “Qarabağ”ın baş məşqçisidir.
“Qarabağ” onun dövründə 5 dəfə Azərbaycan çempionu olub, 4 dəfə Azərbaycan kubokunu qazanıb, 4 dəfə Avropa Liqasının, 1 dəfə Çempionlar Liqasının qrup mərhələsinə düşüb.
