Paşinyan seçkini uddu
Ermənistanda dekabrın 9-da keçirilmiş növbədənkənar parlament seçkisinin ilkin nəticələri açıqlanır. Novator.az-ın məlumatına görə, baş nazir səlahiyyətlərinin icraçısı Nikol Paşinyanın “Mənim addımım” bloku 70,4% səslə seçkinin qalibi olur.
Çiçəklənən Ermənistan Partiyası parlamentə 8,3%, İşıqlı Ermənistan Partiyası 6,4%-lə düşür. Seçki yarışında iştirak edən digər qüvvələr, o cümlədən sabiq prezident Serj Sərkisyanın Respublika Partiyası mandat ala bilmir.
Proporsional üsulla seçilən parlamentə keçid həddi partiyalar üçün 5 faiz, bloklar üçün 7 faizdir.
1975-ci il iyunun 1-də İcevan şəhərində doğulan Nikol Paşinyan əsası 2013-cü ildə qoyulmuş Vətəndaş Sazişi Partiyasının lideridir. O, 2018-ci il mayın 8-dən baş nazir postuna keçib, oktyabrın 16-da növbədənkənar parlament seçkisinə yol açmaq üçün istefa verib, ancaq hökumət başçısı səlahiyyətlərinin icraçısı olaraq qalır.
