Neftin yeni qiymətləri
AZƏRTAC-ın 10 dekabr məlumatına görə, London birjasında brent markalı neftin barreli 61,97 dollara, Nyu-York birjasında layt markalı neftin barreli 52,49 dollara satılır.
Dekabrın 7-də Avstriyanın paytaxtı Vyanada OPEK və qeyri-OPEK rəsmilərinin görüşü keçirilib. Azərbaycanın energetika naziri Pərviz Şahbazovun da qatıldığı görüşdə neft hasilatının 2018-ci ilin oktyabr ayı səviyyəsindən gündəlik 1,2 milyon barrel azaldılması razılaşdırılıb. Qərara əsasən, OPEK üzvləri 2019-cu ilin yanvarından neft hasilatını sutkada 800 min barrel, digər ölkələr 400 min barrel azaldacaqlar. Azərbaycan hasilatı 20 min barrel azaldaraq 763 min barrel həcmində saxlamağa razılaşıb.
Novator.az bildirir ki, “AzəriLayt” 2018-ci ilə 69,89 dollarla start verib. Fevralda ilk qiymət 70,33 dollar, martda 66,61 dollar, apreldə 69,86 dollar, mayda 75,95 dollar, iyunda 79,46 dollar, iyulda 79,23 dollar, avqustda 75,75 dollar, sentyabrda 79,73 dollar, oktyabrda 85,94 dollar, noyabrda 77,23 dollar, dekabrda 61,13 dollar olub.
Energetika Nazirliyinin hesabatlarına əsasən, bu ilin yanvar ayında gündəlik neft hasilatı 814,6 min barrel, fevral ayında 806 min barrel, mart ayında 794 min barrel, aprel ayında 785,7 min barrel, may ayında 801 min barrel, iyun ayında 792 min barrel, iyul ayında 773 min barrel, avqust ayında 774 min barrel, sentyabr ayında 796 min barrel, oktyabr ayında 783 min barrel olub.
İri neft ixracatçılarını birləşdirən OPEK-in 15 üzvü var: Anqola, Birləşmiş Ərəb Əmirlikləri, Ekvador, Ekvatorial Qvineya, Əlcəzair, İraq, İran, Konqo, Küveyt, Qabon, Qətər, Liviya, Nigeriya, Səudiyyə Ərəbistanı, Venesuela.
Qətər 1961-ci ildən üzv olduğu OPEK-dən 2019-cu il yanvarın 1-də ayrılacağını bəyan edib.
