Razılaşma ərəfəsinin qiymətləri
Dünya birjalarında neftin qiyməti düşüb. AZƏRTAC-ın 7 dekabr məlumatına görə, London birjasında brent markalı neftin barreli 59,57 dollara, Nyu-York birjasında layt markalı neftin barreli 51,10 dollara satılır.
Azərbaycan nefti “AzəriLayt”ın barreli 60,24 dollara təklif olunur.
Novator.az bildirir ki, “AzəriLayt” 2018-ci ilə 69,89 dollarla start verib. Fevralda ilk qiymət 70,33 dollar, martda 66,61 dollar, apreldə 69,86 dollar, mayda 75,95 dollar, iyunda 79,46 dollar, iyulda 79,23 dollar, avqustda 75,75 dollar, sentyabrda 79,73 dollar, oktyabrda 85,94 dollar, noyabrda 77,23 dollar, dekabrda 61,13 dollar olub.
Azərbaycanın 2018-ci il büdcəsində neftin qiyməti 55 dollardan götürülüb.
Dekabrın 7-si Avstriyanın paytaxtı Vyanada OPEK və qeyri-OPEK nazirlərinin görüşü keçiriləcək. Azərbaycanın energetika naziri Pərviz Şahbazovun da qatılacağı görüşdə neft hasilatının azaldılması ilə bağlı qərar qəbulu gözlənir.
2016-cı il noyabrın 30-da OPEK üzrə gündəlik neft hasilatının 1,2 milyon barrel azaldılması barədə razılıq əldə olunub. Dekabrın 10-da isə OPEK üzvləri ilə təşkilata daxil olmayan bəzi ölkələr, o cümlədən Azərbaycan ümumi hasilatın sutkada 558 min barrel azaldılması barədə sazişə imza atıb. Həmin sazişin müddəti mərhələlərlə 2019-cu il yanvarın 1-dək uzadılıb.
OPEK+ sazişinin iştirakçıları iyunun 23-ü Vyanada gündəlik hasilatı ümumilikdə 1 milyon barrel artırmaq barədə razılığa gəliblər. Razılaşma iyulun 1-dən tətbiq olunur.
İri neft ixracatçılarını birləşdirən OPEK-in 15 üzvü var: Anqola, Birləşmiş Ərəb Əmirlikləri, Ekvador, Ekvatorial Qvineya, Əlcəzair, İraq, İran, Konqo, Küveyt, Qabon, Qətər, Liviya, Nigeriya, Səudiyyə Ərəbistanı, Venesuela.
Qətər 1961-ci ildən üzv olduğu OPEK-dən 2019-cu il yanvarın 1-də ayrılacağını bəyan edib.
