Mustafa Hacıbəylinin işi məhkəməyə gedir
Bakı Şəhər Prokurorluğu Bastainfo.com saytının baş redaktoru Mustafa Hacıbəylinin cinayət işi üzrə materialları məhkəməyə göndərməyə hazırlaşır. Dekabrın 5-də Bakı Şəhər Prokurorluğuna dəvət olunan Mustafa Hacıbəyli ifadə verməkdən imtina edib, ancaq təqdim olunan bəzi hüquqi sənədləri imzalayıb. Novator.az-a açıqlamasında Mustafa Hacıbəyli deyib ki, paytaxt prokurorluğunda ona cinayət işinin materiallarının gələn həftə Bakı Ağır Cinayətlər Məhkəməsinə göndəriləcəyi bildirilib.
Bakı Şəhər Prokurorluğu Mustafa Hacıbəylini dövlət əleyhinə yönələn açıq çağırışlar, vəzifə səlahiyyətlərini aşma və vəzifə saxtakarlığında ittiham edir.
Bu il iyulun 3-də Rusiya vətəndaşı Yunis Səfərov Gəncədə icra hakimiyyətinin başçısını odlu silahla öldürməyə cəhd göstərib. Hadisə zamanı başçı və bir polis əməkdaşı yaralanıb. Baş Prokurorluq iyulun 8-də açıqlama yayaraq qeyd edib ki, bəzi kütləvi informasiya vasitələrinin vəzifəli şəxsləri, həmçinin ayrı-ayrı şəxslər internet informasiya resurslarında Gəncədəki terror aktı ilə əlaqədar həqiqətə uyğun olmayan təxribat xarakterli məlumatlar yayıb. İddiaya əsasən, həmin məlumatlara ictimai rəyi çaşdırmaq, ictimai-siyasi sabitliyi pozmaq, terrorçuluğu dəstəkləyən, vətəndaşlar arasında dövlətin həyata keçirdiyi tədbirlərə inamsızlıq yaratmaq, cinayətkarlığa qarşı mübarizə sahəsində görülən işlərin üzərinə kölgə salmaq məqsədi ilə bilə-bilə yalan məlumatlar, eləcə də yayılması qanunla qadağan edilən informasiyalar daxil edilərək terrorçuluğa və hakimiyyətin zorla ələ keçirilməsinə və Azərbaycan Respublikasının konstitusiya quruluşunun zorla dəyişdirilməsinə yönələn açıq çağırışlar edilib.
8 iyul açıqlamasında Bastainfo.com saytının da adı hallanıb. Sayt bloklanıb, baş redaktor Mustafa Hacıbəyli Bakı Şəhər Prokurorluğunun bir neçə media orqanına qarşı qaldırdığı cinayət işinə cəlb olunub.
46 yaşlı Mustafa Hacıbəyli Qarabağ müharibəsi veteranı, III qrup əlildir. İndiki Dövlət İdarəçilik Akademiyasını bitirib, Şərqi Avropada Demokratiyanın İnkişafı İnstitutunun layihəsi əsasında Polşada jurnalistika sahəsi üzrə ixtisaslaşıb. “525-ci qəzet”də, “Yeni Müsavat” qəzetində çalışıb, “Demokrat” qəzetinin baş redaktoru olub. Bastainfo.com saytını 2015-ci ildə yaradıb.
Mustafa Hacıbəyli Müsavat Partiyasının mətbuat xidmətinin rəhbəri postunu da tutur.
