Yenə Modriç
Xorvatiyalı yarımmüdafiəçi Luka Modriç “France Football” (Fransa) jurnalının media əhli arasında apardığı sorğuda qalib gələrək 2018-ci ilin ən yaxşı futbolçusu seçilib və “Qızıl top” mükafatının laureatı olub. Mükafatlandırma mərasimi dekabrın 3-ü Parisdə keçirilib.
Luka Modriç FİFA-nın sorğusunda da 2018-ci ilin ən yaxşı futbolçusu adına sahib çıxıb. Həmin sorğuya milli komandaların baş məşqçiləri, kapitanları və FİFA-ya üzv ölkələrin hərəsindən bir jurnalist qatılıb, mükafat futbolçuya sentyabrın 24-ü Londonda təqdim olunub.
Novator.az bildirir ki, Luka Modriç 1985-ci ildə Xorvatiyanın Zadar şəhərində doğulub. Xorvatiyanın “Dinamo”, “İnter”, Bosniyanın “Zrinski”, İngiltərənin “Tottenhem” klublarında çıxış edib.
2012-ci ildən Luka Modriç İspaniya paytaxtı Madridin “Real” klubunda oynayır.
Luka Modriç 2006-cı ildən Xorvatiya milli komandasının da şərəfini qoruyur.
Üçqat Xorvatiya çempionu, İspaniya çempionudur.
4 dəfə Çempionlar Liqasının qalibi olub, 3 dəfə UEFA superkubokunu əldə edib, 3 dəfə klublar arasında dünya çempionluğunu qazanıb.
2018-ci ilin dünya çempionatının gümüş mükafatçısıdır.
