Xidmət statistikası
Əmək və Əhalinin Sosial Müdafiəsi Nazirliyinin yeni hesabatına görə, Azərbaycanda əlilliyi olan 620 minə yaxın şəxs var: “2018-cı il oktyabrın 1-nə 1 milyon 309 min nəfər pensiyaçının 30 faizi əlilliyi olan şəxslər, aylıq sosial müavinət alanların isə 60 faizə qədəri əlilliyi olan şəxslər və sağlamlıq imkanları məhdud uşaqlardır.
Müharibə əlillərinə və onlara bərabər tutulanlara, həmçinin yalnız aylıq müavinət alan, ümumi səbəblərdən I qrup əlilliyi olanlara prezidentin aylıq təqaüdü verilir.
1997-ci ildən bəri mənzillə təmin edilən 6,1 min nəfər əlil və şəhid ailəsindən də təqribən 75 faizi müharibə əlilləri və onlara bərabər tutulanlar, gözdən əlilliyi olanlardır. İndiyədək 6 mindən çox müharibə əlili və onlara bərabər tutulan şəxsə isə dövlət büdcəsi hesabına minik avtomobili verilib.
Müharibə əlillərinin, I və II qrup Çernobıl AES əlillərinin uşaqlarına da aylıq sosial müavinət, radiasiya qəzası nəticəsində zərər çəkərək əlil olmuş şəxslərə hər il müalicə üçün birdəfəlik müavinət ödənir. Evlərində sosial xidmətlə təmin edilənlərin 2,3 minə qədəri əlilliyi olan şəxslərdir.
2018-ci ildə Əmək və Əhalinin Sosial Müdafiəsi Nazirliyi 1229 nəfər əlilliyi olan şəxsin istirahətini təşkil edib.
Nazirliyin 14 bərpa-müalicə müəssisəsində hər il əlilliyi olan 10 mindən çox şəxsə bərpa müalicəsi xidməti göstərilir. Bu ilin 11 ayında əlilliyi olan 8,2 min şəxsə (o cümlədən 956 nəfər Qarabağ müharibəsi əlilinə) və sağlamlıq imkanları məhdud uşağa 29,4 min müxtəlif reabilitasiya vasitəsi, o cümlədən 1200-ə yaxın əlil arabası verilib. Dövlət Məşğulluq Xidməti vasitəsilə 500-dən çox şəxs işlə, 60-dan çox şəxs ödənişli ictimai işlə təmin olunub, 320-dək şəxs peşə hazırlığına cəlb edilib.
1000 nəfərdən çox şəxs özünüməşğulluq proqramına cəlb olunub, onlardan 300 nəfəri proqram çərçivəsində mal və materiallarla təmin edilərək kiçik ailə təsərrüfatlarını yaradıb”.
