Maaş, qonorar, 1800 dollar, maşın
Ermənistan hökumətinin başçısı, dekabrın 9-da keçiriləcək parlament seçkisində “Mənim addımım” blokunun namizədi olan Nikol Paşinyan əmlakı və gəlirləri haqqında rəsmi bəyannaməni açıqlayıb. Novator.az bildirir ki, Mərkəzi Seçki Komissiyasına təqdim olunmuş bəyannamədə Nikol Paşinyanın maaş qismində gəliri 5 milyon 152 min 343 dram göstərilib. O, “Antares” Açıq Səhmdar Cəmiyyətindən 3 milyon 919 min 95 dram qonorar aldığını da bəyan edib.
Baş nazir əvəzi bəyannamə təqdim etdiyi vaxta 1800 dollar nağd pulu olduğunu bildirib.
Nikol Paşinyanın “Hunday Sonata” markalı maşını da var.
Seçki yarışına “Mənim addımım” bloku ilə yanaşı “Bizlər” bloku, Ermənistan Respublika Partiyası, Çiçəklənən Ermənistan Partiyası, Daşnaksütun Partiyası, Qanunçuluq Ölkəsi Partiyası, İşıqlı Ermənistan Partiyası, Milli Tərəqqi Partiyası, Xristian Demokrat Dirçəlişi Partiyası, Vətəndaş Qərarı Sosial Demokrat Partiyası, Sasun Dəliləri Partiyası qatılıb.
Proporsional üsulla seçilən parlamentə keçid həddi partiyalar üçün 5 faiz, bloklar üçün 7 faizdir.
1975-ci il iyunun 1-də İcevan şəhərində doğulan Nikol Paşinyan əsası 2013-cü ildə qoyulmuş Vətəndaş Sazişi Partiyasının lideridir. O, 2018-ci il mayın 8-dən baş nazir postuna keçib, oktyabrın 16-da növbədənkənar parlament seçkisinə yol açmaq üçün istefa verib, ancaq hökumət başçısı səlahiyyətlərinin icraçısı olaraq qalır.
Nikol Paşinyanın həyat yoldaşı Anna Akopyan “Aykakan jamanak” qəzetinin baş redaktorudur. Onların dörd övladı var.
