Yalnız bir təmsilçi məlumdur
“Avroviziya 2019” beynəlxalq mahnı müsabiqəsinə qatılacaq 42 ölkədən yalnız biri – Ermənistan öz təmsilçisini müəyyənləşdirib. Novator.az-ın məlumatına görə, Ermənistanın İctimai Televiziyası yarışa müğənni Srbui Sərkisyanın göndəriləcəyini bəyan edib.
Gələn ilin mayında İsrailin baş şəhəri Tel-Əvivdə keçiriləcək yarışmanın birinci yarımfinalı mayın 14-nə, ikinci yarımfinalı mayın 16-na, finalı mayın 18-nə təyin olunub.
Mahnı müsabiqəsində iştiraka ev sahibindən savayı 41 ölkə razılıq verib: Albaniya, Almaniya, Avstraliya, Avstriya, Azərbaycan, Belarus, Belçika, Böyük Britaniya, Çexiya, Danimarka, Ermənistan, Estoniya, Finlandiya, Fransa, Gürcüstan, Xorvatiya, İrlandiya, İslandiya, İspaniya, İsveç, İsveçrə, İtaliya, Kipr, Latviya, Litva, Macarıstan, Makedoniya, Malta, Moldova, Monteneqro, Norveç, Niderland, Polşa, Portuqaliya, Rumıniya, Rusiya, San Marino, Serbiya, Sloveniya, Ukrayna, Yunanıstan.
Ev sahibi İsrail, eləcə də yarışma təsisçiləri olan Almaniya, Böyük Britaniya, Fransa, İspaniya, İtaliya “Avroviziya 2019”un finalına birbaşa vəsiqə alıblar.
1956-cı ildən keçirilən “Avroviziya” yarışı ictimai teleradioları cəmləşdirən Avropa Yayım Birliyinin layihəsidir. Azərbaycan “Avroviziya”ya 2008-ci ildən qatılır. 2008-ci ildə Elnur Hüseynov və Samir Cavadzadə 8-ci, 2009-cu ildə Aysel Teymurzadə və Araş 3-cü, 2010-cu ildə Səfurə Əlizadə 5-ci, 2011-ci ildə Nigar Camal və Eldar Qasımov 1-ci, 2012-ci ildə Səbinə Babayeva 4-cü, 2013-cü ildə Fərid Məmmədov 2-ci, 2014-cü ildə Dilarə Kazımova 22-ci, 2015-ci ildə Elnur Hüseynov 12-ci, 2016-cı ildə Səmra Rəhimli 17-ci, 2017-ci ildə Diana Hacıyeva 14-cü yeri tutub.
“Avroviziya 2018”də təmsilçi Aysel Məmmədova yarımfinalda ələnib.
