Vahid Ələkbərov 24 milyarder arasında 5-cidir
Rusiyanın 24 milyarderinin ümumi varidatı 2018-ci ilin yanvar-noyabr aylarında 2 trilyon 657 milyard dollara çatıb. Hesabat milyarderlərə məxsus şirkətlərin səhmlərinin dəyərinə əsaslanır.
Novator.az-ın məlumatına görə, Rusiyanın ən varlı adamları siyahısına “Novatek” qaz şirkətinin idarə heyətinin sədri Leonid Mixelson başçılıq edir. Onun var-dövləti 11 ayda 3,59 milyard dollar artaraq 20,3 milyard dollara çatıb.
İkinci yerdə “Norilskiy nikel” şirkətinin prezidenti Vladimir Potanin gəlir. 2018-ci ilin yanvar-noyabr aylarında onun varidatı 1,11 milyard dollar artaraq 20 milyard dollar olub.
Metallurgiya, nəqliyyat sahəsi üzrə biznesmen Vladimir Lisin üçüncü yerdə qərarlaşıb. Biznesmen 2018-ci ilin 11 ayında var-dövlətinin həcmini 584 milyon dollar artıraraq 18,6 milyard dollara yüksəldib.
Dördüncü pillədə “Severstal”ın əsas səhmdarı, qara metallurgiya və maşınqayırma üzrə biznesmen Aleksey Mordaşov gəlir. Amma biznesmenin var-dövləti 11 ayda 1,47 milyard dollar azalıb. Aleksey Mordaşov 18,2 milyard dollarlıq varidat sahibidir.
Varlı iş adamları reytinqinin beşinci pilləsində “Lukoyl” şirkətinin azərbaycanlı prezidenti Vahid Ələkbərov yer alır. O, 11 ayda varidatını 3,63 milyard dollar artırıb və 16,2 milyard dollarlıq var-dövlət sahibdir.
Səidə Hüseynova
