Xırdalanda çıxarış kampaniyası
Əmlak Məsələləri Dövlət Komitəsi noyabrın 30-da növbəti çıxarış kampaniyası keçirib. Kampaniyanın ünvanı Xırdalan şəhərində yeni inşa edilmiş çoxmərtəbəli yaşayış binası olub. Bina sakinlərinə yaşadıqları ünvanda mənzillərinə dair çıxarışlar təqdim edilib.
Rəsmi məlumata görə, 16 mərtəbəli binada yaşayan 40-a yaxın mənzil sahibinə çıxarışlar verilib, 60-a yaxın sakindən çıxarışla əvəz olunması üçün ilkin mülkiyyət sənədləri qəbul edilib, vətəndaşlara daşınmaz əmlakın qeydiyyatı qaydaları və qanunvericiliyin tələbləri ilə bağlı hüquqi yardımlar göstərilib.
Xəbərdə qeyd olunur ki, yeni inşa edilmiş çoxmərtəbəli binanın istismara qəbul icazəsi olduğu təqdirdə mənzil sahibləri tikinti kooperativi ilə imzalanmış protokoldan çıxarışı və maliyyə arayışını reyestr xidmətinin ərazi ofislərinə təqdim etməklə çıxarışlarını ala bilərlər. İndiyədək 30-a yaxın yeni inşa edilmiş çoxmərtəbəli yaşayış binasında belə çıxarış kampaniyaları keçirilib.
