Rusiyalı kişilərin Ukraynaya girişi dayandırıldı
Ukraynanın Dövlət Sərhəd Xidməti Rusiya vətəndaşı olan kişilərin ölkəyə girişini müvəqqəti yasaqlayıb. 16-60 yaşlı şəxsləri əhatə edən qadağa hərbi vəziyyət dövründə qüvvədə olacaq.
Novator.az-ın məlumatına görə, noyabrın 30-u güc strukturlarının rəhbərləri və xarici işlər nazirinin qatıldığı iclasda çıxış edən Ukrayna prezidenti Pyotr Poroşenko deyib ki, Rusiya vətəndaşlarına giriş yasağı ölkədə qanunsuz hərbi birləşmələrin gücləndirilməsinin qarşısını almaq məqsədi güdür.
Noyabrın 25-də Rusiya sərhədçiləri Qara dənizdən Azov dənizinə üzən üç Ukrayna hərbi gəmisini əsir alıb. 24 dənizçi həbs edilib. Bunun ardınca Ukraynanın Çerniqov, Sumı, Xarkov, Luqansk, Donetsk, Zaporojye, Xerson, Nikolayev, Odessa, Vinnitsa vilayətlərində, Azov dənizi və Qara dənizdəki daxili sularında bir aylıq hərbi vəziyyət elan olunub.
Rusiya 2014-cü ildə Ukraynanın Krım bölgəsini işğal edərək özünə birləşdirib, həmçinin Donetsk və Luqansk vilayətlərinin (Donbas bölgəsi) bir hissəsini işğal altında saxlayan separatçı rejimləri dəstəkləyir. Bu üç bölgədən 1,5 milyondan çox ukraynalı köçkün düşüb. Donbas bölgəsində 2014-cü ildən davam edən silahlı münaqişədə 10 mindən çox adam həlak olub.
