Əcnəbi brakonyerlər yaxalanıb
Biləsuvar rayonu ərazisində icazəsiz ov edən əcnəbi vətəndaşlar saxlanılıb.
Məlumat Novator.az-a Ekologiya və Təbii Sərvətlər Nazirliyinin mətbuat xidmətindən verilib.
Əcnəbi brakonyerləri nazirliyin Bioloji Müxtəlifliyin Qorunması və Xüsusi Mühafizə Olunan Təbiət Ərazilərinin İnkişafı Departamentinin əməkdaşları yaxalayıblar.
Araşdırma zamanı brakonyerlərin Qətər vətəndaşı Xalid Abdulla Əl-Tani və Səudiyyə Ərəbistanı vətəndaşı Əlhəmədi Əli Cəmil olduğu müəyyən edilib. Onlardan bəzgək quşları götürülüb və təbiətə buraxılıb.
Bəzgək quşları “Qırmızı kitab”a daxildir.
Faktla bağlı əcnəbi brakonyerlər barəsində akt, protokol tərtib olunub və onlara ümumilikdə 5980 manat məbləğində ziyan və cərimə tətbiq edilib.
Masallı rayonunda keçirilən reyd zamanı isə icazəsiz ova cəhd edən Sığıncaq kənd sakini Amid Hacıyev saxlanılıb və ondan ov tüfəngi götürülüb. Amid Hacıyev barəsində akt, protokol tərtib olunub, ona 1000 manat məbləğində cərimə tətbiq edilib.
