Ukraynanın orta maaş göstəriciləri
Ukraynanın Statistika Komitəsi 2018-ci ilin yanvar-oktyabr ayları üzrə orta əməkhaqqı hesabatı açıqlayıb. Novator.az-ın məlumatına görə, hesabatda bildirilir ki, noyabrın 1-nə ölkədə orta maaş 2017-ci ilin 10 ayı ilə müqayisədə 14,2% artıb.
Oktyabrda ştatlı işçinin orta nominal əməkhaqqının 9,2 min qrivnaya (552 manat) çatdığı və bu məbləğin minimum əməkhaqqından (3,7 min qrivna – 222 manat) 2,5 dəfə çox olduğu vurğulanır.
Hesabata əsasən, 10 ayda ən yüksək orta əməkhaqqı paytaxt Kiyevdə qeydə alınıb – 13,8 min qrivna (828 manat).
Donetsk vilayəti üzrə orta maaş 10 min qrivna (600 manat), Dnepropetrovsk vilayəti üzrə 9,4 min qrivna (564 manat) göstərilir.
Ən aşağı orta maaş göstəricisi Çernovtsı vilayətində qeydə alınıb: 7,1 min qrivna (426 manat).
2018-ci il oktyabrın 1-nə Azərbaycanda muzdla çalışan işçilərin orta aylıq nominal əməkhaqqı 540,5 manat olub. Minimum əməkhaqqı isə 130 manatdır.
Səidə Hüseynova
